為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2017 年 02 月 12 日

塵埃落定 林奕匡

眼前的林奕匡,努力以廣東話表達着想說的話,但從他的語氣腔調和舉手投足之間,卻不難感受到那濃烈的半唐番味道。

事實上,他在加拿大溫哥華出生和成長,是個正宗的ABC。「我有好多嘢都好外國人思想、好open-minded;但同時間,我亦有好多values好傳統、好Chinese,好似我覺得一定要識中文啦;又好似我grow up嘅時候,都係畀廣東歌同香港劇集浸大,黃日華做嗰套《射鵰英雄傳》,同埋劉德華嗰套《神鵰俠侶》,我都睇過o架!」

○八年六月上旬,他來到香港為歌唱事業尋找出路,便一直以工作簽證留了下來,晃眼間八年多,今天的他終於取得香港身份證,正式成為了香港人。
「o依家我真係有種落地生根嘅感覺!之前我喺北京或者台灣做完嘢返嚟香港,口快快會話:『coming back home』我啲溫哥華嘅朋友就會話:『where is your HOME?』

「講真,加拿大呢,永遠都係我嘅老家,係我一個成長嘅地方,我係會返去嘅;但香港有我嘅女朋友、工作事業同埋居所,呢度已經係我嘅屋企。」
此心安處是吾鄉,其實只要心在,哪裏都可以是家。

 

 

入境處

提到近日終於有資格取得香港身份證,林奕匡鬆了一口氣地說:「呢七年,真係一啲都唔短呀!」只因當中最折磨他的,是經常要到入境處為工作簽證續期。「咁多年嚟,我去過入境處冇五十次,都有四十次!嗰度係我一個極之討厭嘅地方!第一次攞簽證已經夠難,延續個證,仲難!

「佢哋每次都會問我:『你繼續留喺香港,會對香港有乜貢獻呀?你會請幾多人呀?你公司賺唔到錢o架喎,點解仲要畀你留喺度做呢?』嘩!好煩!跟住我愈嚟愈識答:有乜貢獻呀?我有寫歌畀自己,畀陳柏宇、謝安琪、周柏豪呀。請唔請人呀?我嚟緊會請助手呀……吹咋嘛,咪次次都同佢哋吹一輪囉。」

而每次申請了續期後,卻遲遲未批時,最叫他頭痛。「頭嗰兩、三年,公司見我冇乜成績,叫我等吓,但係我唔等得一世o架嘛,我分分鐘會畀人踢出境o架嘛!跟住有啲內地嘅工作,公司又唔敢幫我接,因為我離咗境,就返唔到嚟,我就做唔到嘢。

「最激氣係,我到咗七年嘅話,已經可以攞身份證,但係之前一次個visa竟然啱啱去到六年零十一個月到期!喂!你玩我咩?咁我咪即要續多次?哈哈哈!」

 

 

好煩呀

除了續簽證夠他煩外,沒有身份證在港居留,亦有很多生活上的不方便。「開個銀行戶口,我都要搞多啲手續,仲有報稅嗰啲嘢,我每年要搞呢啲paperwork,係咁厚呀!」說時以手指作了一個三吋厚的比劃。

「就算係我嘅電話號碼,都係under我女朋友(Rikko李靄璣)嘅名,我想更改個plan任何嘢,都要我女友在場、身份證同簽名。喂!電話係我用緊,係我畀緊錢o架喎!」

林奕匡說,這些年在香港,他周不時會被視為一個識講廣東話的外國人。「啲人成日問我:『你係咪喺外國返嚟o架?有冇去過山頂呀?』喂!我住咗喺香港幾年啦!仲問我呢啲?不過呢,後尾我又覺得,我畀到人有呢啲『唔似香港人』嘅感覺幾好呀,呢個先係我獨特嘅地方嘛,都係一件好事嚟嘅。

「我諗我未必會會成為一個一百個percent嘅香港人,但係八、九成都好呀!」

在加拿大溫哥華出生的林奕匡,小時候只有哥哥一個華人朋友。「喺嗰邊,啲人會認為我係個識講英文嘅中國人。」

 

○八年來港發展歌唱事業時,正值北京奧運。「我女朋友嗰陣要做奧運主持,好忙,更加令我覺得自己好得閒。」