周子揚男同志寵兒
周子揚喺前年年尾約滿無綫後，就北上發展搵人仔。除咗每月畀成萬銀喺北京租屋住，舊年佢又斥資六位數，開工作室力捧自己。好彩，都接到唔少內地電影同綜藝節目，不過又要兼顧香港嘅地產同金融公司，同埋賣吓保險，所以成日要兩地飛，一個月起碼飛五轉！之但係收入就三級跳，辛苦少少，又何足掛齒吖。
早前，周子揚為內地綜藝節目《你猜同不同》錄影，期間要接受連續十六小時嘅性取向測試，包括喺台上面食蕉、求婚、打籃球等等，然後再畀現場觀眾投票估吓佢係咪基民？事後，佢就同東姑大呼過癮，最正係孭班同志主持打籃球，畀人驗心跳率嗰part喎！
除此以外，佢重有意外收穫添，「班主持有幾個係基嘅，錄完之後，佢哋又問我拎聯絡，又約我去街。」佢愈講愈興奮，繼續同東姑大爆，「以前我喺台灣住過，試過有次喺街度行，有兩個基佬追住我，但係都開心嘅，原來我都有基嘅市場。」冇咗一個何傲兒，發現一個大「基」場，周子揚不愁寂寞。
為咗驗證周子揚心跳有冇加速，佢要孭住位同志主持一齊打籃球，但佢就話：「又要跑又要跳，正常都會心跳加速啦！」
除咗打籃球之餘，佢又要做sit-up，而個男主持仲要坐喺佢下身噃，「呢個動作畀人諗到啲衰嘢，佢哋話想睇吓我有冇反應喎。」
節目另設有才藝表演環節，周子揚一邊彈結他，一邊唱歌，大晒練習多年嘅結他功力。
日前，佢同父母出發到上海，錄影另一個內地綜藝節目《中國式相親》，節目內父母會幫佢揀「新抱」，娛樂性十足。
