黃宗澤拍廣告解相思苦

黃宗澤（Bosco）同佢位日本模特兒女友Jun，因為拍攝美容健康食品廣告而撻着，但長期分隔兩地，異地戀好難維繫。難得撮合佢哋兩個嘅產品廣告商，今年連續第三年搵佢哋拍廣告，情侶檔合體寓工作於拍拖，總算一解相思之苦！

Bosco話畀東姑知，當佢知道同Jun再拍檔都好開心，仲第一時間同對方講添；而今次已經係佢哋第三次合作，所以拍起上嚟都好有默契。佢仲讚女友好注重健康，不嬲戒食肉，所以皮膚唔錯喎。

另外，為咗鏡頭前有最fit狀態，Bosco搵埋私人健身教練陳志健監場，幫佢即場training操肌，佢話呢個廣告難度係要拍落水嘅畫面。咁蹺操刀拍廣告嘅，係佢初入行時，拍檸檬茶廣告嘅同一個導演。大家十幾年冇見，拍廣告撞番，仲要都係拍佢落水鏡頭，感覺好得意，好有緣份喎！

不過，東姑覺得點都唔及佢同Jun咁有緣，一個日本、一個香港，千里姻緣因為一個廣告而一線牽！

Bosco同日模女友Jun合體拍廣告，寓工作於拍拖，一解兩地相思之苦。

第三次同Jun搭檔，兩人拍起上嚟好有默契，情侶之間梗有啲心有靈犀嘅。

廣告導演咁啱得咁蹺，係Bosco出道第一個檸檬茶廣告導演，不過再有緣份都唔及佢同Jun，千里姻緣一線牽。

當年同張栢芝合作拍檸檬茶廣告，都係需要佢落水，不過嗰時仲係嫩口小鮮肉，好fresh好green！