為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2017 年 02 月 04 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

味想新滋味

踏入雞年,TVB嘅賀歲劇《味想天開》就進入結局周,我就邀請劇中嘅男女主角,洪永城(Tony)同蔡思貝擔任雞年首個「Paco巨星飯堂」嘅嘉賓,除咗帶出劇中滋味,兩位嘉賓仲率先透露雞年大計,夠晒positive!

我帶兩位嘉賓去到位於銅鑼灣嘅「嘉門鐵板燒」,以既精緻又富有特色嘅日本料理,同佢哋開年!

Tony同思貝喺劇集《味想天開》拍出默契,連擺pose都一致。今周劇集踏入結局周,佢哋就親自劇透。

 

拍出好氣氛

劇集播出以來,最高收視達廿六點,喺現今娛樂方式層出不窮嘅時候,算係不俗嘅成績!思貝話:「拍嘅時候都冇諗過收視,而且劇集播映嗰陣,我又拍緊另一個劇集,o依家見到成績唔錯,其實都好開心,希望結局周嘅收視繼續升,咁樣對我哋嚟講係好大嘅鼓勵!

「我喺呢個劇都有唔少突破,好似係我喺一個劇入面,摑人摑得最多次o架!對手就得一個——就係洪永城嘞!哈哈!」

Tony聞言即回應:「我喺套劇入面,畀人摑得多,又畀人吊得多,成日畀人喺城門吊落嚟,都好辛苦吓。不過,拍嘅時候好開心,除咗思貝之外,仲有黃子恆、朱晨麗同何雁詩等,思貝就成日都好energetic,令拍攝現場個個都畀佢感染咗。」

兩位男女主角仲率先劇透:「話晒係賀年劇,我哋喺劇入面係happy ending嘅。」

我帶兩位嘉賓去到位於銅鑼灣嘅「嘉門鐵板燒」,以既精緻又富有特色嘅日本料理,同佢哋慶祝雞年嘅來臨。

 

 

 

Tony同思貝喺劇中展現默契外,前者話劇集係自己從演以來被吊(從城門吊下)得最多次,但拍攝過程歡樂,再辛苦都值得。

 

特色時令前菜拼盤,以每日精選食材炮製,詳情可向餐廳查詢。

 

嘉門午市壽司定食($328),精選十款時令高級刺身做成壽司,包括吞拿魚、左口魚及海膽等。

 

雜錦刺身($580/六款)由廚師挑選當日最新鮮刺身,包括:油甘魚、吞拿魚、牡丹蝦、金目鯛、生蠔、北寄貝。

 

大團圓之後

劇集有happy ending,兩位主角喺雞年就有大把大計。

Tony表示:「嚟緊三月我同思貝又會喺新劇合作,今次唔係古裝嘞!係一套民初劇,詳情我先賣個關子。另外我仲plan緊喺今年內拍旅遊特輯,目的地可能都係中東地區,之前嘅《走過烽火大地》都去過嗰啲地區,今年就暫定做一個follow up,去睇吓啲戰亂地區,喺五年後有冇咩轉變。」

思貝都有一個個人大計。「除咗拍劇,我想喺空閒嘅時間,挑戰吓自己,練個6-pack(六塊腹肌)出嚟。我見到通常都係男士練,好少女仔會去練,而且我以前都有做開運動,係返咗香港加上要拍劇,所以就冇時間去做。今年我覺得要趁自己仲後生,就要pick up番,唔係到老啲嘅時候就更加難練到6-pack。」

新一年Tony除咗會繼續拍劇,佢仲會再踏上征途,走訪世界拍攝旅遊特輯。

 

思貝正在同王浩信拍攝新劇《踩過界》,佢喺劇中戴上假哨牙,造型已令人留下深刻印象。

 

Tony同女友唐詩詠感情穩定,見晒家長嘅佢話同「外父」食飯,緊張過同自己父母好多。

 

嘉門釜飯($680/二人用)飯面鋪滿鮮味海膽,加上於客人面前片出嘅黑松露,更添貴氣。

 

燒物拼盤(每款$68-$108),鹽燒雞軟骨、鹽燒牛脷、鹽燒雞翼、鹽燒日本黑豚五花腩、鹽燒鰻魚(左至右),各具特色。

傳統私習俗

中國人過年習俗多,雖然Tony同思貝都喺紐西蘭留學,但骨子裏都相當傳統,尤其係思貝。

「由細到大,過年嘅時候如果我喺香港嘅話,大年初一朝早一起身,刷咗牙洗咗面之後,我同阿哥睡衣都未換,第一樣嘢就係斟茶畀爹哋媽咪飲。我哋係會跪喺地下,同父母講啲好感性嘅說話,佢哋又會好感性咁回應。每年嗰個時刻,我都覺得成家人特別close。」

Tony就話:「我屋企過年就冇思貝咁傳統,但團年、開年都唔少得,不過我通常都係負責食,煮就真係唔使預我,哈哈!」

過年前後,思貝仍要埋首趕拍劇集,三月又要同Tony喺另一部新嘅民初劇中合作,非常忙碌。

 

嘉門鐵板南非鮑魚($198),鮮味鮑魚配上即席炮製嘅鮑魚膽醬汁,份外滋味。

 

嘉門鐵板法國藍龍蝦($680),醬汁以龍蝦頭蝦膏作材料,香濃味美,伴上日式抹茶素麵,提升味蕾感受。

 

日本甘鯛($380),甘鯛以煎焗方式烹調,伴以甘筍及原條甘鯛魚湯,味道鮮甜濃郁。

 

嘉門宮崎A5和牛($480),選用脂肪分布平均嘅宮崎A5和牛,配上自家調製嘅香草海鹽,更具性格。

 

嘉門鐵板燒
地址:銅鑼灣登龍街18號V Point 28樓
電話:28118138