廖偉雄機場頻撲
廖偉雄（阿燦）淡出娛樂圈之後，撈過唔少生意，由傳銷到做飲食，可惜運氣麻麻，之前嘅生意不少都係仆直收場。不過，東姑就係欣賞佢永遠打不死嘅精神，o依家主力返廣東羅定搞有機米，上個月仲攞咗中國十大大米品牌；而老婆仔女就喺大馬睇住盤燕窩生意，佢兩邊頻撲久唔久又返吓香港亮相，客串演出吓，真係永不言倦。
早前，東姑就喺香港機場撞到阿燦，見佢清晨已經嚟到趕飛機，好匆忙咁辦理登機手續。雖然佢行色匆匆，但係面色就唔錯，樣睇落仲好精神。聽聞佢早輪先做完腎臟大手術，不過當日就完全睇唔出，相信因為佢強橫意志撐得住，所以認真唔到你唔佩服！
阿燦晨早去到機場check in，神情係有啲呆滯，但面色同精神都算唔錯。
阿燦早排做過腎臟手術，東姑之前仲擔心佢健康狀況，不過見佢仍然四圍飛風塵僕僕，應該好番晒喇！
