Fit馬唔做財爺去湊孫

港鐵主席馬時亨（Fit馬）近日喜事連連，先係港鐵觀塘延綫和港島南綫順利開通，在私則係佢女婿劉仲恒（下圖左一）出來創業搞醫學診斷中心，同佢囡囡馬露明一樣自己搞生意，開展人生新里程。

劉醫生原本在廣華醫院做放射科專科，去年八月靜極思動，和同事拍檔鄭文輝出走，投資數千萬元在中環娛樂行開醫學診斷中心，上周六正式開幕時，Fit馬一家一齊到賀。

Fit馬提起呢位女婿就笑不攏嘴，讚佢勤力上進，為咗創業，過去一段時間由早忙到晚，揀地方和搞裝修一腳踢，個女就忙着管理自己嘅教育中心，Fit馬為咗支持佢哋，直情由自己間大屋搬去住女婿屋企樓下一層，住近啲方便幫手湊孫，等佢哋無後顧之憂。

Fit馬用佢哋兩個例子，話年輕人創業講究勇氣和堅持，旁人支持十分重要，所以佢做得幾多就幾多，反正佢和太太又好鍾意啲孫仔。

這些年一直有傳Fit馬係特首黑馬之一，早前又話佢係財爺熱門人選，問Fit馬上帝有無同佢講嘢，有無人畀紅燈綠燈佢?佢笑話上帝經佢太太和兩個女兒，總共三個董事長同佢講，三大盞紅燈照住佢，教佢動彈不能，唔使諗再入政府。

不過話又不能說太死嘅，好似佢之前喺港鐵傳媒同樂日，話自己一七年嘅身份係唔會變，好多傳媒都有報道佢呢番說話。然而筆者在場聽得真切，佢的確係有咁講，但好多人都聽漏咗最重要一句，就係「直到今日為止，我一七年嘅身份係唔會變……」係直到佢講嘅一刻咋，所以話，聽政治人物講嘢，真係要聽足至得，Fit馬係高手，說話又點會講得咁無轉彎餘地呢?