為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2017 年 01 月 21 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

發達有計

即將踏入雞年,普遍嘅香港人都會有一個「發達夢」,咁由阿Bob(林盛斌)孭飛嘅賀歲片《我要發達》,就夠晒好意頭,畀你尋夢!

今次「Paco巨星飯堂」,我就邀請阿Bob,同戲中嘅女主角唐詩詠(Natalie),仲有孫慧雪同導演葉念琛,去到位於旺角嘅「空海」,品嘗日式全蟹宴,暢談「發達」背後嘅故事。

由阿Bob擔正嘅電影《我要發達》,係雞年賀歲片嘅頭炮,呢位男一喺戲中同Natalie(右)、雪雪(左)都有唔少對手戲,喺新年為觀眾大放笑彈。

 

我帶導演葉念琛、Natalie、阿Bob同雪雪,去到位於旺角嘅「空海」,品嘗日式全蟹宴,暢談「發達」背後嘅故事。

 

首任男一

阿Bob近年鴻運當頭,賀歲檔頭炮都要由佢孭飛,故事關於香港人中六合彩嘅發達夢,瘋狂情節抵死過癮,男一阿Bob話:「平時拍戲客串一兩場玩完就算,今次要由頭帶到尾都好大壓力,但係搵到唐詩詠做我嘅初戀情人,無得頂!

「其實套戲係好多香港人嘅生活寫照,相信中六合彩亦係好多人嘅心願,希望觀眾入場笑餐飽之餘亦可沾吓啲旺氣,散場再去買注六合彩發個新年財!」
導演葉念琛就話:「阿Bob一向都有喺我嘅電影客串,但係客串都已經好搶fo,所以我一直都想搵佢做男一,今次就啱晒!」

Natalie首次擔任電影女主角,就遇上阿Bob呢個搞笑高手,不論係拍攝時定係今次嘅飯敍,一樣係笑聲不斷。

阿Bob亦感謝葉念琛出盡力幫佢入戲,「我本身對自己都幾有要求,之前《沒女神探》都會睇得好緊,而今次葉念琛為幫我掌握角色,直頭同我講:『阿Bob,你諗吓你一個咁廢嘅廢柴(戲中角色),中咗幾千萬嘅六合彩,你幻想吓你係會點樣,你應該係會崩潰、開心到爆!』。嗰場戲我放盡去拍,導演亦攞部機lock住我,成場戲分幾鐘一shot過,拍完我個人直頭謝咗。」

廢柴Bob造型核突又爆笑,但居然有跟Natalie、雪雪、陳嘉桓三位「宅男女神」埋牙肉搏嘅機會,令整部片充滿Fantasy感,單看預告片已笑到肚痛。「一開始我好大壓力,因為成部戲要由頭帶到尾,直頭唔知點去處理,而最感恩係能搵到唐詩詠做我夢中情人,我嘅初戀,真係very good!」

 

 

阿Bob喺戲中有玲玲師傅飾演佢嘅嬌妻,佢同Natalie就大讚玲玲師傅,每日開工都以愛心鮑魚慰藉所有工作人員嘅味蕾。

 

陳嘉桓係阿Bob喺戲中另一位「女神」,前者都毫不吝嗇咁大show長腿。

 

 

演技突破

阿Bob自爆拍攝時對Natalie心動,「Natalie演技好好,記得有場戲講我中咗六合彩後,佢走嚟求我幫手,嗰種眼神、感覺好可憐,你係會好想即時攬住佢、錫住佢,拍完我真係好想同佢男朋友Tony講,你真係要對佢好啲呀!」

同樣被葉念琛睇中、首次擔正做電影女主角嘅Natalie話:「我同導演之前都有喺《龍咁威2》合作過,今次佢話想搵我拍愛情片,我即時(舌累)飯應啦!心諗好浪漫喎,但係一聽到男主角係阿Bob,就覺得呢部應該唔係愛情片,諗咗十秒,覺得都係開心嘢,所以即時答應接拍。」

Natalie坦言,導演要求好高,而佢都學到嘢。「有場酒吧戲拍咗三十幾個take,因為導演想我修改演繹方式,所以一路畀咗好多指引我,去到最後一take,我發現真係最好,佢亦都收貨。其實出嚟拍戲,就係想喺其他人身上學習,自己拍咗咁耐戲,可能有啲位平時無留意到,需要人哋提點。」

葉導一直都想搵阿Bob擔正,今次就終於成事,二人仲非常合拍。

 

首次任男一,阿Bob都十分專業,不時同導演睇playback,務求做得更好。

 

新婚快樂

有導演、男女主角,就梗係唔可以忽略喺戲中一樣舉足輕重嘅雪雪啦!「我喺戲入面飾演一個日本AV女優,係阿Bob嘅性幻想對象,叫『波多野雪雪』。導演同阿Bob都好有心思,我拍出嚟嘅相都真係好似真嗰啲AV封面。」

阿Bob即時補充:「雪雪練到連講廣東話都有日本人口音,我覺得真係專業!」

啱啱新婚嘅雪雪,雖然喺戲中有性感演出,但係佢就唔怕老公Edwin詐型。「出嚟嘅效果咁好,我要同佢一齊入場睇添呀!哈哈!之前我拍寫真嘅時候,其實佢都有喺拍攝現場,見到我啲性感造型,佢都會讚我靚o架!不過,試過有一次我着一件低胸裝去event,佢都有話會唔會低咗啲嘅。」

一臉幸福嘅雪雪,不忘大讚老公,盡顯新婚嘅喜悅。「佢好照顧我同我啲屋企人,我最鍾意係佢同我一樣咁低能!哈哈!鍾意去夾公仔,有時啲好簡單嘅嘢都可以笑一餐!」

雖然已為人妻,但係雪雪話老公冇詐型,只要係為藝術,都唔會抗拒性感演出o架。

 

雪雪喺戲中飾演AV女優「波多野雪雪」,佢仲努力練習日本人講廣東話嘅口音,滿足宅男。

 

新婚一個月嘅雪雪,幸福地話最愛老公Edwin同自己一樣咁「低能」。

 

餐廳提供四款全蟹套餐,名為「風」、「林」、「火」、「山」,價錢由$398至$698,不設加一;每個套餐均有五道菜式,由前菜到甜品,詳情可Whatsapp查詢。前菜為柚子蟹肉龍蝦海老沙律,集牡丹蝦肉、澳洲龍蝦肉、蟹肉於一身,加上淡淡柚子香,夠晒開胃。

 

海膽汁松葉蟹肉以加拿大海膽製作醬汁,混合蟹肉,可夾紫菜或淨食,各有風味。

 

每個套餐嘅不同之處在於丼飯,「風」套餐($398/位)嘅係一層秘伝蟹黃醬丼,蟹黃混合蟹膏同蟹肉嘅甘香,相當濃郁。

 

「林」套餐($498/位)嘅丼飯係一層秘伝蟹黃醬丼加澳洲龍蝦,龍蝦係原隻烚煮後拆肉,鮮甜!

 

「火」套餐($598/位)同「山」套餐($698/位)嘅丼飯,分別係一層及兩層秘伝蟹黃醬丼加澳洲龍蝦、帶子及海膽,前者(圖)已經夠晒rich,每一口都係海洋嘅原味。

 

松葉蟹釜鍋嘅湯底,係以三十斤蟹殼熬煮四小時而成,清香鮮甜;加上已拆殼嘅松葉蟹鉗,啖啖肉,令人食得滿足。

 

空海 地址:旺角廣華街13號廣輝大廈地下2號舖 電話:60108932