「十優港姐」麥明詩與大律師男友林作的關係欲斷難斷，雖然講到明關係「降呢」成為「朋友」，但又經常見到兩人有影皆雙。 而一向不乏追求者的麥明詩，近日更被指有「新歡」劍橋同學兼藥房少東Thomas Chong管接管送，因而傳出緋聞。

本刊發現，儘管有情敵殺到埋身，但林作似乎冇有怕，繼續風流快活，到處「孔雀開屏」。除了狂冧合作拍微電影、組合Bingo的隊長Carman（關嘉敏）之外；日前，他更被發現於中環密會一名長髮索女，兩人漫步街頭喁喁細語，後來更愈走愈埋，頭貼頭依偎而行，舉止親暱。看來「作詩戀」，今鋪認真「凍過水」！

麥明詩與大律師男友林作，早前雖然講明關係「降呢」為朋友，但仍經常被發現有影皆雙，約埋食飯，關係撲朔迷離。

林母幫手「箍煲」

一五年港姐冠軍麥明詩（Louisa），當選初期已被踢爆與有米大律師林作拍拖，惟去年六月，林作被影到趁女友在深圳拍劇期間，夜蒲密會索女Victoria兼「抄牌」，致令女友爆喊鬧分手。麥明詩默認與林作三年情玩完，又「降呢」兩人關係為「朋友」。不過，中秋節正日，她卻被撞破與林作家人食飯團圓；早前，她的二十五歲生日派對，林作也是座上客，更有傳是林作為冧女友，出錢又出力幫女友開生日會，兩人關係撲朔迷離。

據知情人士指，林作「抄牌」事件，的確令雙方一度陷入分手邊緣，多得林作媽媽代子求情做「和事佬」，才令麥明詩回心轉意，知情者說：「林媽媽真係好鍾意Louisa呢個新抱仔，出事之後不停幫個仔講好說話，Louisa卒之心軟都同林作好番。不過件事咁肉酸好難落台，所以Lousia同林作約法三章，以後感情事要低調處理，o依家兩個見面都係匿埋長輩屋企，偷偷摸摸拍拖玩地下情囉！」

藥房太子爺Thomas與麥明詩是劍橋的同屆同學，被指冧爆女方，經常做「柴可夫」管接管送。

Thomas早於麥明詩主持的《星星探親團》中亮相，女方更讚賞他是「社交界萬能拍檔」，二人感情深厚。

 

Thomas家族經營「金輪大藥房」，是行內的老字號，於銅鑼灣、灣仔設四間分店，而伯父莊純傑更是劉德華的御用中醫。