為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人專訪 2017 年 01 月 13 日

脫穎而出 王躍穎

學生哥總對出路感到迷茫,不過十七歲的王躍穎(Kadin)已經未雨綢繆,一早認清未來去向。爸爸是電影演員王敏德,媽媽是名模馬詩慧,身為孻仔的他,早已被父母薰陶,決意進軍娛樂圈。

「我好欣賞爹哋,好想好似佢咁拍戲,最想當然係拍荷李活電影,但我知呢個係好遙遠嘅夢。佢有同我講,拍戲唔係我諗得咁簡單,可能要捱好耐先捱出頭,但我唔怕,就係想演戲!爹哋媽咪都支持我,所以我要入娛樂圈!」

家有兩個role model(榜樣),出路?一早已經鋪好!

一邊埋頭操肌,一邊吸收演藝技能,王躍穎立志要成為演員:「我有不停睇戲,學習用面部表情做emotion(情感),都有諗過去美國讀演藝。」

 

家有萬能爸媽

自己不算是經常到健身中心健身的人,但每次去做gym,都會碰到王躍穎。十七歲已昂藏六呎的他,做十分鐘重力訓練,已大汗淋漓,佬味甚濃。「我已經高過爸爸,係全家最高,希望仲有得高啦!我嘅理想身高係六呎二,因為(方便我)打籃球,同埋女仔都係鍾意高啲嘅男仔o架嘛!」一星期操足五日,每次兩個鐘,如此勤力,皆因討厭被二家姐王麗嘉批評。「二家姐成日都話我太瘦,好唔鍾意聽到佢講呢句說話,所以我要練大隻啲!」

論大隻,王躍穎同爸爸王敏德有得揮,現就讀香港華仁書院中四的他,講起父親,句句有讚無彈。

「佢乜嘢我都欣賞,由佢拍戲、唱歌到飛機(做直升機師),(角色)成日轉嚟轉去,一直無停過,工作咁忙都仲要照顧屋企,好欣賞佢咁hard working嘅心態。

「我細個見到阿爸拍戲,都好開心。喺螢光幕前,見佢做一個唔同形象嘅人,我會覺得好特別;佢又帶我去片場見成龍,我勁開心!嗰時得五歲,我仲即場耍咗幾套功夫畀成龍睇添,哈哈!雖然細個爸爸好少返屋企,唔係成日見到佢,但佢一喺屋企,就一定會同成家人去玩!」

對父親讚不絕口,對母親馬詩慧更是絕對崇拜。「嘩!阿媽簡直無得頂啦!佢真係太勁嘞!家務又係佢,照顧我哋三姊弟又係佢,我放完學返嚟,煮飯畀我食嘅又係佢,又要出去做嘢搵錢,好欣賞佢。而且佢對我好free,係對我學業嚴謹少少,同講到明唔可以紋身同食煙!」

王躍穎一家五口關係相當親密,對早前被影到一拖四位索女夜蒲,他笑言:「十七歲唔可以去蒲,但阿媽畀咪得囉,我有問過先,如果唔問過就自己出去玩,返屋企就大鑊。」

 

大數二姐惡行

有一對出色的父母,王躍穎二十四歲的大家姐王曼喜,及二十二歲的二家姐王麗嘉,同樣受媒體注目,他笑言三人經常互恰,更大數二家姐的「惡行」。
「我哋三姊弟成日都互恰,但唔會好認真咁鬧交,成家人都好close,鬧完好快就會笑番。二家姐好鍾意出外搵朋友,亦好有天份做model,但真係懶得滯,叫佢出去casting,佢又驚尷尬,唔想喺人哋面前擺甫士,成日宅喺屋企,唔知佢想點,但阿媽教咗佢(擺甫士)之後,佢o依家開始覺得舒服啲;而且佢對我好嚴,只要我出去蒲,佢一定報寸畀阿媽知!

「相反大家姐份人陽光啲,一定會幫我keep secret(保守秘密),唔想我畀阿媽鬧,所以通常我有啲咩秘密,都會話畀大家姐聽!」

一四年,王曼喜被影到與前外籍女友Lia於街頭激吻,並承認自己同性戀身份,談到此事,王躍穎憶起當初大家姐向父母「出櫃」的經過。

「好突然,當時我仲坐喺個廳度唔知發生咩事!嗰時我中一、二,家姐話咗畀阿爸阿媽聽之後,佢哋反應唔係話好大,只係問:『Are you sure?』唔係質疑佢,只係問清楚家姐,然後就接受咗佢呢個選擇,唔係好介意。所以屋企人一早知,我亦唔會因為佢鍾意女仔而唔鍾意佢,佢想點就點,佢鍾意、開心咪得囉!」

○八年,(左起)八歲的王躍穎已與母親馬詩慧、大家姐王曼喜、二家姐王麗嘉(右三)及父親王敏德(右二),一家五口出席公開活動,見慣大場面。

 

講到明受父親影響而想做演員的他,笑言不會刻意追看父親的電影劇集: 「早排電視播《創世紀》我都有睇爹哋做戲,但無刻意去搵佢嘅電影嚟睇,反而朋友會專登播畀我睇。」