為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2017 年 01 月 14 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

影后導路

一聽劉美君(Prudence)之名,除咗會聯想到佢嘅音樂,就一定係佢嘅「影后」名銜!我就會稱呼Prudence為劉導演,因為佢喺ViuTV嘅新節目《碌卡大導》中,首執導演筒,為其中一個單元《公仔醫生》擔任導演,實行演而優則導。

今次「Paco巨星飯堂」,我就誠邀劉導演,率領為佢擔任副導演嘅樂壇新星周殷廷(Yan Ting),去到位於尖沙咀嘅「The Joomak」,品嘗特色韓國美食,細說佢嘅「導路」經歷。

Prudence演而優則導,為ViuTV嘅節目《碌卡大導》碌盡人情卡,執導其中一個單元。已為影后級人馬嘅佢,不論撰寫劇本定係執導過程,都係咁一絲不苟。

 

星級班底

Prudence首次做導演,我梗係要特別同劉導演打招呼!「哈哈!又幾好聽喎!我一直都有做導演嘅計劃,咁啱ViuTV搵我拍節目嘅其中一個單元,我睇完有關公仔醫生嘅case,已經好鍾意,所以就喺美國遙距碌我嘅人情卡。

「我嗰part有兩個古仔,關於愛情嗰個,我就請咗孫耀威、AGA同Gin Lee;關於親情嗰個,就有Robynn & Kendy,同埋我照住佢,去寫戲入面個好爸爸角色嘅大佬John岑建勳。In real life佢真係一個好好、好sweet嘅爹哋,所以唔可以唔搵佢演呢個角色!」

Prudence直言,今次製作費好少,但佢搵嘅幕後班底,全部屬大師級人馬。「攝影,我二話不說,就打咗畀溫文傑,佢都好幫手,自己喺浸會做教授分唔到身,就派咗啲徒弟徒孫幫我;另一個我着重嘅係配樂,我童星出身,之後又做過製片,就算唱歌嘅時候,我嘅音樂都好visualized,我覺得音樂同影像係分唔開嘅,所以我就搵咗陳光榮,佢又係好有義氣,即刻應承!

「而且同幾位演員一樣,有啲crew連利是都冇,服裝又要出自己私伙,我將慳到嘅錢,全部捐去慈善機構。」

我帶Prudence同Yan Ting去到位於尖沙咀嘅「The Joomak」,品嘗特色韓國料理,暢談導、演之道。

 

 

 

首次做導演嘅Prudence(上圖)話,喺撰寫劇本時以岑建勳為藍本,創作一個好爸爸嘅角色。

 

龍蝦豐盛拼盤($498),係火鍋配料,除咗有主菜龍蝦,仲有唔同種類嘅海鮮、蔬菜,夠晒多選擇。

 

人參雞鍋($238)係餐廳獨有提供嘅火鍋湯底,湯底以五隻新鮮走地雞及韓國高質人蔘等材料燉煮五小時;雞就選用法國春雞,極具特色。

 

大蜆泡菜羅宋湯底($158),以肥美沙白,伴以芽菜、滑豆腐及泡菜煲煮,由於加入大量鮮甜番茄,味道帶酸甜香味,紅噹噹貌似羅宋湯,味道則非常鮮甜。

 

重點新星

今次Prudence做導演,除咗碌咗唔少人情卡,仲有Yan Ting呢位驚喜新星拔刀相助。「我初初見Yan Ting,真係畀佢個外形呃咗,以為佢係嗰啲飛仔、bad boy,但係真正認識佢之後,就發現佢好downto earth、好純,跳舞又好睇,加上佢大學又係讀電影製作,所以真係幫咗我好多!」

生於香港長於新加坡嘅Yan Ting,高大外形的確潛質優厚。「我大學畢業之後就去咗當兩年兵,之後就返香港,拎住自己製作嘅demo叩門,好彩有人畀機會我,先可以做到自己嘅音樂。

「今次同Prudence合作,除咗學到好多嘢,仲見識到佢引導演員入戲嘅特別方式。可能因為佢係演員出身,佢會好似心理輔導員咁,引發佢嘅演員喺戲中嘅情景展露最natural嘅反應,呢個係令我最佩服嘅地方。今年我會開始拍電影,喺Prudence身上學到嘅嘢,好有用!」

Yan Ting除咗擔任Prudence其中一位副導演外,仲粉墨登場飾演戲中一角。

 

伍詠薇伍姑娘係《碌卡大導》另外一位女導演,佢以女人心拍一個關於姊弟戀嘅故事。

 

詹Sir詹瑞文係節目另一單元嘅導演,對演藝經驗豐富嘅佢,係一項新挑戰。

 

喺Kevin Boy(小圖)執導嘅單元中,有鄭中基(左)同RubberBand嘅6號(右)幫拖。

 

巨型雪耳韓牛($498)係另一道火鍋配料,頂級韓牛加上滋補雪耳,相當養生。

 

健營藜麥沙律($128),係食得健康之選。

 

弄孫為樂

踏入一七年,Prudence已經滿腦大計,「今年我會做一隻英文碟,因為之前已經做咗一隻廣東同一隻國語碟,都係翻唱我自己鍾意嘅歌。到十月我就會喺紅館開show,o依家已經開會傾吓點做,我唔想叫個show做『演唱會』,因為我想做一啲特別啲嘅嘢,所以o依家就要plan定點做。」

話雖如此,但Prudence都要飛返美國,為嘅就係佢將於三月度過三歲生日嘅孫仔Mason。「我enjoy家庭生活,係一個家庭觀念好重嘅人,所以我好enjoy湊孫o架!佢好sweet好cute,我返香港都要每日同佢video call。」

湊孫係Prudence嘅「運動」之一,另一項就係瑜伽。「以前我有做其他運動,不過o依家只係keep住做yoga,但係我食量都好大o架!食牛扒起碼要食二十安士嘅,但係我只係鍾意食New Zealand嘅牛,因為係100% grass fed,咁先夠organic。」

要好似Prudence咁保持至fit體態,佢嘅貼士係「有機」!

雖然係首次合作,但Prudence對Yan Ting讚不絕口,指佢喺bad boy「外殼」之下,係一顆純真的心。

 

事業得意,Prudence同男友Steve嘅感情亦甜如蜜。

 

Prudence喺美國弄孫為樂,佢不時喺ig大晒同快將三歲嘅孫仔Mason嘅溫馨合照。

 

近年茹素者大增,羽衣素飯卷($108)為精點素食。

 

抹茶炸雞($138)為餐廳於二月推出嘅新菜式,為傳統韓式炸雞加添創意。

 

配料鮮魷魚($48/碟)屬大廚之選,食材係每日新鮮運到,爽口味甜。

 

The Joomak
地址:尖沙咀廣東道17號海港城海運大樓3樓LCX 34號舖
電話:21110851