主頁 > 專欄 > Paco巨星飯堂 > 奉旨嬉春 2016 年 12 月 31 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

奉旨嬉春

一講「嬉春」，唔少人可能會聯想到一啲18禁嘅畫面，但係假若附加人物係詹瑞文詹Sir、伍詠薇、林嘉華同向海嵐（Anne），成件事即刻爆笑化，因為佢哋正演出搞笑舞台劇《嬉春酒店2016》。

有咁多位實力派演員參演嘅喜劇，發放高密度笑彈可謂預計之中嘅事，今次「Paco巨星飯堂」，我就誠邀四位，連同同劇有豐富舞台劇演出經驗嘅陳康同賴慰玲（Winki），去到位於銅鑼灣嘅「潮薈」，一邊品嘗特色潮州菜，一邊公開「嬉春」背後嘅秘密。

由「舊人」伍姑娘、嘉華哥，配搭「新人」詹Sir同阿Anne（左至右），令舞台劇《嬉春酒店》更令人期待。

猛料「新人」

舞台劇喺一五年慈善公映時，已經贏盡口碑，到年尾就跨年開show至一月一日，仲搵嚟戲劇大師詹Sir坐鎮，令整個劇昇華。呢位「新人」笑言：「今次接呢個劇，首先係因為大部份人都以為我唔識同人做戲，所以我為咗畀觀眾睇吓我點樣同唔同經驗質素嘅演員合作；其次係原著劇本出自法國好有名嘅George Feydeau，中文係『費多』，即係廢話特別多，我心諗既然呢個劇本有咁得意嘅元素，就等我好好去做『費多』呢個法國經典浪漫偷情『動作』喜劇。」

另一位「新人」，就係飾演潑辣老婆嘅阿Anne。「我本身都有留意呢個劇，因為我平時好文靜，今次演呢個角色，就覺得好大挑戰，我希望畀人一種唔同嘅感覺。喺埋位排戲前，詹Sir捉住我同伍姑娘，做咗好多唔同嘅練習。今次仲同好多專業舞台劇演員去做，唔會有太多爆肚，詹Sir教我好多技巧，好似講對白嘅聲線、速度，學到好多嘢。

「舞台劇冇得NG，無機會返入後台睇劇本，一路殺到尾。排戲前，我同伍姑娘都擔心話要回家背劇本，但詹Sir話唔使背嘅，只要了解成部戲前文後理，啲對白自然就會入晒腦。」

我帶陳康、阿Anne、詹Sir、伍姑娘、嘉華哥同Winki，去到位於銅鑼灣嘅「潮薈」，以特色潮州菜，配襯一眾嘉賓為舞台劇《嬉春酒店》籌備嘅精采點滴。

台上兩個鐘，已經足以令伍姑娘、詹Sir、嘉華哥、阿Anne同陳康（左至右）排足N個鐘，先培養到合作搞笑嘅步伐同默契。

招牌鹵水拼盤（$788），鹵水係餐廳以秘方自家炮製，質素同味道都係全港獨家。

百花竹笙卷（$388），唔單止賣相精緻，釀於竹笙內嘅手打蝦膠，非常彈牙。

高手過招

今次有高手相贈「錦囊」，令有份參演Round 1同Round 2嘅伍姑娘，都升級成「Version 2.0」。「去年三月我哋做咗十場，監製見反應口碑咁好，就話不如開Part2，但男主角就試吓搵舞台劇專業人士，一搵就搵到呢個咕嚕（詹Sir），直頭係神級大師！」

今次飾演溫柔角色嘅伍姑娘，坦言話要挑戰自己。「今次挑戰第二個角色，上次演惡妻就手到拿來，今次要同人偷情就難啲，因為成件事唔可以咁太外露，而且偷情要好笑得嚟，又要騷在骨子裏，我就諗究竟點去偷情好歡愉，又可以令觀眾好想睇你去偷情囉。

「好多人以為偷情嘅衣着會好性感，但實情又唔係，我個角色啲衣着好密實，但男人見到係會幻想佢着透視裝，咁嗰種性感點去拿揑呢？詹Sir就會日日捽，埋位排戲前會幫我同阿Anne執。因為我哋都係電視、電影嘅演員，同舞台劇唔同，但佢會無私地教我哋，好濃縮咁用一個月嚟教我哋演戲，呢個雞精班絕對係可攞9A！」

阿Anne今次破天荒飾演惡女，同演技高手詹Sir過招，爆發笑彈。

排練都出足十成功力，詹Sir、阿Anne、嘉華哥同伍姑娘（下圖）絕不欺場。

潮州凍蟹（$1,380），鮮甜味美。

北菇金腿扒潮州大芥菜（$288），係傳統嘅潮州菜式。

「演藝」精英

同樣有份演出兩Round嘅嘉華哥，今次都係演繹另一個角色。「去年我做嘅角色，係今次伍姑娘這角色嘅老公，我驚頂唔順要避，所以就由陳康飾演。伍姑娘今次嘅突破，比平時演嘅角色更加堅，加埋個劇神詹Sir，真係無得傾，點可以唔繼續演？今次一路排戲一路畀詹Sir提點，加埋陳淑儀導演一夾，令我呢幾十年啲所有功夫都有突破。」

而陳康同Winki，就尊稱詹Sir為「大師兄」。佢哋異口同聲話：「我哋同導演、詹Sir都係演藝學院畢業，有好多嘢佢哋講一句，甚至只係一個眼神，我就get到佢哋想點，呢種默契對演出舞台劇係好重要嘅。」