又到聖誕 又到聖誕

聖誕節除咗可以同家人朋友歡度之外，對餐飲業同零售業嚟講係一個賺錢嘅節日，對普羅大眾就梗係使錢嘅日子啦，香港雖然係個小小嘅地方，想買咩都可以買到，想食咩都可以食到，o依家買嘢雖然未必好似從前被叫做購物天堂，但稅制低兼失業率持續低，再加上香港無咩太多天然災害，相比起世界好多其他地方，香港事實上就係一塊福地，佔盡種種天時地理優勢，講得老套啲我好愛我哋呢個家。

大家唔知有無留意到各類貨品嘅減價促銷廣告喺今年好似提早咗見報，各類名牌及非名牌等嘅一系列產品亦提早咗減價促銷，不過就算減價促銷對部分身邊朋友都好似無咩太大影響，佢哋消費嘅意欲相比起上年似乎真係無咁旺。

加上環球經濟放緩，人民幣貶值兼美國加息，似乎畀晒藉口我哋今年聖誕節要慳住使。對於好多時要買聖誕禮物嘅男士嚟講，可以買少啲嘢慳啲啲錢，一定唔會有投訴，而且做到源頭減廢又都幾好吖，不過當然一眾男士身邊嘅老婆或者女朋友又應該唔會係咁諗囉。

今年受到環球經濟放緩，人民幣貶值兼美國加息影響，聖誕節市民的消費意欲似減弱了。

今年九月政府統計處公布咗私營機構總就業人數，與上年同期比較，大部分選定行業嘅就業人數係有所增加，所有涵蓋行業總共僱用咗2,814,500人，喺69,340個私營機構職位空缺當中，餐飲業同零售業係穩佔首兩位，做呢兩類行業嘅朋友要轉工應該會易啲。

雖然本港失業率微跌至3.3%，零售業失業率維持喺5.3%，不過大部分私營機構嘅招聘意欲仍然維持審慎，單從呢個角度嚟睇，一眾打工仔點都要打醒十二分精神做好份工，點都要捱到出花紅先好諗轉工，真係真係想要轉工，點都要諗清諗楚先好。

雖然部份僱主招聘意欲審慎，凡事總有兩面睇，我認為年輕人要搵工，講得招積啲係因為年輕人有嘅係時間，不妨試下搵、同去做多啲唔同行業嘅工種，唔試多啲新嘢又點知邊個工種啱，亦無謂強加個框架框住自己，反正大家有嘅係大把青春，而且搵到啱先會有興趣做，有興趣又先會開開心心咁去做。

環球經濟持續唔明朗，美國特朗普雖然未上場，但從佢最近喺一連串非正式外交事務嘅表現上，暫時都未可以令市場對佢大選時所作出嘅經濟威脅釋懷或者有所改觀，雖然我對整體經濟持樂觀態度，但總會有人秉持謹慎兼認為應使則使，咁我又唔反對大家量入為出呢個使錢態度。何況今時今日有幾多使幾多，對好多人嚟講係奢侈品，更未必人人都可以應付到。我認為如果將量入為出呢個態度稍微調適再引申到我哋日常生活上，就好似同量力而為有異曲同工之妙。