為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 12 月 22 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

多謝失戀

聖誕佳節將至,指定動作唔一定只係開Party,仲可以去捧每年聖誕都有新作上映嘅葉念琛場!今年葉導再夥拍Stephy(鄧麗欣),刻畫時下女性嘅心思,藉新戲《失戀日》呈現於觀眾眼前。

唔少人話失戀會令人成長,但葉導嘅電影世界又點會咁單一化?今次「Paco巨星飯堂」,我就誠邀佢,率領Stephy、劉浩龍(師兄),仲有首次拍攝電影嘅麥明詩(Louisa),去到位於銅鑼灣嘅「Seafood Room」,細說「失戀」背後嘅故事。

Louisa、師兄同Stephy(左至右)首次喺電影《失戀日》中合作,前者仲係處女拍電影,後兩者則飾演拍拖已久嘅情侶,表現令人期待。

 

我帶四位嘉賓去到位於銅鑼灣嘅「Seafood Room」,品嘗海鮮盛宴。

 

 

 

張繼聰(右圖右)同師兄(左圖左),喺戲中同Stephy都有大量交流。

 

貼地阿寶

導演葉念琛同Stephy合作過逾九部電影,但係師兄就爆料話二人冇乜交流,Stephy就解釋:「其實係我哋太信任對方,拍攝嗰陣,我係唯一一個角色事前有劇本,其他人去到現場先有,我一早知道晒古仔,大家有晒默契,喺片場唔使講嘢,已經知對方要乜。」

導演就話:「搵呢位御用女主角拍《失戀日》時,撞正佢同方力申分手嘅尷尬期,加上戲名敏感,Stephy話驚記者會炒作新聞,幾經考慮先接拍。我覺得『阿寶』就好似同Stephy一齊成長,冇佢唔得!而且系列由單身、熱戀、紀念到分開,係為佢度身訂做嘅一個戀愛寫照。」

三十三歲嘅Stephy喺戲中飾演貼地嘅三字頭女生,面對愛情、事業同生活都需要抉擇。佢話:「今次個『阿寶』同以前好唔同,無論造型同性格都差好遠,佢有個拍咗拖七年嘅男友,每日重複步伐,想跳出框框。於是拍之前,我就狂食兩星期,增肥3kg,去演繹呢個外表蠢鈍嘅中女角色。」

Langoustine Tartar($290),係以挪威的海螯蝦製成嘅他他菜式,將生海螯蝦蝦肉剁碎,再放於切成粒狀嘅牛油果之上,配以新鮮松露、松露醬及魚子醬,味道層次豐富。

 

Seafood Room Ceviche($180),用上嚟自嘅吞拿魚、挪威嘅三文魚同法國嘅鱸魚,以南美酸汁醃魚,帶酸嘅味道相當醒胃。

 

Seafood Platter($600/ 每位、四位用),包括:法國生蠔Fine de Claire、新西蘭青口及蜆、阿拉斯加皇帝蟹、日本海膽、蝦及鰤魚等,種類繁多。

 

XO醬炒龍蝦球($750),廣東XO醬烹調方式弄製,將新鮮龍蝦去殼起肉,配以日本香菇、蘆筍等,加入XO醬炒煮而成。

 

Salt Baked Fish(Seabass、$90/100克),係精選法國鱸魚,以鹽焗方式烹調,保存魚肉鮮味及多汁,上桌後會配以白酒、香蔥忌廉汁,配搭一流。

 

阿拉斯加皇帝蟹($530),於蟹腳嘅蟹肉上加上日式芥末乳酪醬,經烤焗更加鮮甜。

 

熒幕初吻

無獨有偶,拍檔師兄都刻意谷肥自己:「我個角色原本係一個當紅男歌手,之後事業跌落谷底,於是中年發福去做個傳銷員。今次係我從影八年以嚟,終於有機會獻出我嘅熒幕初吻,好多謝Stephy可以帶動到我,又相信我,令大家好自然咁去kiss,不過都係錫面啫。」

Stephy同師兄呢pair嶄新組合,令人有驚喜;導演就話,戲中仲有唔同亮點,其中一個係出爐金馬獎「最佳女配角」金燕玲。「金燕玲姐姐不嬲都好戲,我對佢喺《心動》入面打Gigi(梁詠琪)嗰幕,仲歷歷在目。我問佢有冇同Gigi排過,佢話:『我唔會試戲,因為我係100%投入!』,有幾場戲出到嚟都非常好睇,好有張力!我覺得佢可以激發到Stephy嘅潛能出嚟。」

Stephy話最深刻嗰幾場母女爭吵戲,兩人七情上面,阿媽仲激動掌摑阿女,Stephy仲記憶猶新:「導演呃我,話拍到打嗰吓就Cut,但卒之佢冇嗌Cut,跟住金燕玲姐姐就打咗落嚟!仲試過有次打到飛甩眼鏡;有次就打到我暈暈哋,嗰種慘痛,係真實反應嚟!」

Stephy喺失戀嘅敏感時刻,幾經掙扎後接拍《失戀日》,同師兄齊齊增磅,夠晒貼地。

 

葉導再次喺聖誕黃金檔期推出新作,以愛情掛帥,探討三十代女人心。

 

港姐秘招

今次係Louisa首次參與電影拍攝,而且戲份相當吃重,佢話:「最初導演搵我嘅時候,我都有啲擔心;不過之後我就發現佢係一個好着重同演員溝通,而且好知道點樣去引導演員入戲,我都學到好多嘢。今次我嘅角色同Stephy嘅好唔同,係一個主觀到有啲離地嘅女仔,如果自己覺得係啱嘅,就會好義無反顧咁堅持。(Stephy:「咁同你真人似唔似?」)哈哈!導演係將我真人某啲性格,無限放大!」

身為港姐,Louisa有一套飲食秘招。「我好鍾意食魚,尤其係蒸魚,唔會肥又有啲蛋白質!」所以就keep到白滑靚肌!

戲中角色為愛情義無反顧,Louisa直言係佢真實性格嘅一小部份。

 

Louisa同Dominic(何浩文)飾演情侶,早已經帶起話題。

 

除咗有Stephy(左)飾演嘅「阿寶」,另一亮點係好戲之人金燕玲(中)飾演嘅「寶媽」,要密切留意。

 

Seafood Room 地址:銅鑼灣謝斐道535號Tower 535 26樓 電話:37089668