為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 12 月 21 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

綿綿親情 回歸恬靜

特首梁振英(CY)早前宣布唔再連任競逐下屆特首寶座,全城都感到意外。社會上對CY喺呢幾年嘅評價褒貶不一,但政治生態就係咁,好難用一把尺去量度絕對嘅對與錯,最後歷史自有公論。今次佢主動退選,主流意見就認為係因為佢得唔到阿爺嘅祝福,照顧家人都只係用嚟當退下火線嘅藉口。不過我認為每一個人做事,都有自己嘅理據,大家無必要太過「陰謀論」去將件事複雜化。

CY嘅退選,市場焦點除咗盤算「阿爺」嘅諗法上,部分亦有落嚮佢次女齊昕身上。雖然我唔識齊昕,但提到佢,真係有啲不吐不快。作為我兒女嘅父親,或齊昕嘅世叔伯及旁觀者,我認為過去呢幾年發生嚮這小妮子身上嘅一切,簡直非一般人可以承受,對佢及對第一家庭亦好唔公平。

講真,每個人都好想開心快樂地成長、可惜礙於個人唔同嘅主觀因素及客觀條件,每個人會行唔同嘅路,我只可以講發生喺齊昕身上嘅一切,唔係佢獨有,好多年輕人甚至係成年人,都同樣有機會面對咁嘅問題,只因為佢係特首個女,加埋香港o依家嘅政治生態,先會令佢成為幾百萬人嘅焦點,呢啲外間嘅壓力好自然會令問題進入咗一個惡性循環。

梁振英放棄連任,好多人認為係得唔到阿爺嘅祝福,但睇吓佢家人近年承受的壓力,CY說要照顧家人而退下火線,亦無可厚非。

大家不妨易地而處去諗下,如果你哋嘅親人好似齊昕一樣身體不適,每日仲要受到周遭人嘅冷眼,你又會點自處呢?我明白作為政治人物,行每步棋都要有好多部署,但當去到一個吃力後而又不討好嘅境地時,回到照顧及保護家人嘅「天職」位置未嘗不是好事,至於喺「阿爺」點諗呢個關節上其實就已經再無關痛癢。

我哋呢啲已經登陸嘅阿叔,叫做見過吓世面,有事業又有完整嘅家庭,面對餘下人生旅程時,普遍唔會只係諗自己嘅得失,一定會將家人放嚮首要位置。我同特首係英皇舊生,喺英皇舊生會亦曾經共事過,雖然我倆好少講私事,但喺我哋嘅圈中都知佢好重視家庭、太太同兒女,今次佢棄選雖然有啲出乎我哋意料,但亦體諒佢有呢個決定。事實上,作為特區政府嘅首長,好多嘢都要好透明,作為「第一家庭」嘅成員,仲更要承受比一般政客及明星更加之大嘅壓力,何況近年香港嗰種「親者痛、仇者快」嘅政治及社會生態,處於另類「下把位」嘅特首同其家人,所要面對嘅壓力就更加唔使多講。

曾經有人對我講過,就算有幾精采、幾好睇嘅電影或演唱會,都有落幕嘅一刻,落幕後就得要返家休息,共敍天倫,尤其喺呢幾年總覺人生進入倒數時刻,就更加體會到呢句說話嘅真義。姑勿論大家對CY之前從商、從政、甚至去到做特首上嘅評分如何,我哋都唔可以否定佢喺家庭崗位上嘅付出。在此我誠心祝願CY喺「卸甲」後,萬事都可以從心所欲!