為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2016 年 12 月 15 日

蔡伯勵預測 香港身子弱 難受惠「熱錢」

二○一六年話咁快剩低幾個星期,曾經預測今年係「三破年」、社會紛爭不斷嘅曆法專家兼堪輿界翹楚蔡伯勵,再預測香港下年流年運程。佢預測下年會「好頭好尾」,頭尾兩個月都幾順境,農曆正月「春光明媚」,十二月就「晚年安度」。

蔡伯勵預測香港下年「好頭好尾」,頭尾兩個月都幾順境。

 

雖然有好多「熱錢」流入,但蔡伯勵預測香港身子弱,虛不受補,經濟受惠唔多。

但中間有三個月,包括新曆三、八、十月較凶險,其中新曆八月,被批為「似涉天時人事,對風風雨雨,人畜衞生,應早作預防」。佢解釋,該月人事糾紛較多,更有機會出現人畜疫症爆發,要做好預防工夫。佢又預測,明年新曆四月,即係特首選戰塵埃落定後,社會氣氛緩和,大家可以唞下氣,可望和氣生財。

經濟方面,佢話香港身子弱,虛不受補,擔心明年就算有「熱錢」流入,香港都受惠唔多,經濟只會穩步改善,難有大躍進。

十二生肖運程方面,最旺嘅生肖係馬,有「天德星」照住,喜上眉梢。屬呢個生肖嘅政界名人,包括o岩o岩宣布唔連任嘅特首梁振英,莫非佢退落嚟真係「無官一身輕」,生活過得更逍遙?但屬兔嘅朋友就要小心行事,事關下年佢哋「犯破之年、凡事謹慎」,而特首戰疑似大熱之一嘅財政司司長曾俊華咁o岩屬兔,睇嚟佢真係要審時度勢,行好每一步棋。

屬馬嘅特首梁振英(中)下年退落嚟,唔知會唔會如蔡伯勵預言,喜上眉梢?林鄭(左)及曾俊華又能否更上一層樓?好快揭曉。

明年係雞年,蔡伯勵贈言呢個生肖嘅人「過剛易折、和氣致祥」,言下之意係屬雞嘅朋友為人剛強,要加啲親和力才能成大事。喺咁多位司局長之中,「好打得」嘅政務司司長林鄭月娥就係屬雞,參考蔡師傅嘅贈言,強化親和力都無壞的。

蔡伯勵話十二生肖中,屬犬嘅朋友都算幾好運,佢批佢哋「正義凜然、小人走避」。芸芸城中名人中,有「亞瑟王」之稱嘅香港大學校委會主席李國章,就係呢個生肖,單係睇「亞瑟王」喺港大風波中擊退一班硬闖校委會會議嘅學生,就知「小人走避」呢句話都幾貼切。

每年年尾都係九十四歲蔡伯勵最忙嘅日子,埋首研究曆法,編製家傳戶曉嘅通勝,佢話通勝係中國文化遺產,好想盡努力將呢樣嘢傳承落去,幾辛苦都值得。

蔡伯勵編製嘅通勝家傳戶曉,通勝屬中國文化遺產,值得傳承落去。