「頭皮？No way！」九十年代一個洗頭水廣告，令美籍華裔網球名將張德培（Michael）在香港爆紅。

八九年奪得法國網球公開賽冠軍的他，早已享負盛名，最威水莫過於他年紀輕輕，以十七歲零三個月之齡，成為網球史上最年輕的大滿貫男單冠軍，更是亞洲裔唯一大滿貫男單冠軍得主，稱霸球壇。

退役十三年，現年四十四歲的張德培，雖然外表成熟了不少，但對網球的熱誠，依然不減當年，早前來港出席《明日之星培訓計劃》，更親自落場與小朋友切磋球技，「做運動員好辛苦，成功向來唔容易，要綜合好多條件，但無疑上天有賜予我天份，加上我嘅努力同堅持，將壓力變成動力，所以我當時相信，始終有一日我會為自己嘅成就而感到自豪！」

一四年成為日本網球手錦織圭教練的他，指亞洲運動員質素逐漸提升：「今時今日多咗好多公開賽，運動員好多機會攞經驗，我相信香港嘅運動員將來都會好出色。」

少年得志

闊別兩年，張德培近日再度來港出席活動，手拿網球拍、一身運動look上場的他，依然魄力十足，太太劉安寶則全程做「跟得夫人」，靜靜在旁欣賞丈夫的英姿。球場下的張德培，說着一口流利英語，他自言後悔太遲學講普通話：「零三年退役之後我先學普通話，去北京學咗五個星期，每日上四個鐘課堂，然後回到房間做普通話功課；返到美國之後，除咗同父母講普通話之外，其餘時間都係講英文，所以我啲普通話仲係麻麻地。」

父母是台灣人，從少移居美國的他，六歲便跟父親張洪笙學打網球，十二歲便贏得美國少年硬地網球單打冠軍，十五歲再奪美國全國少年網球錦標賽冠軍，十六歲正式加入職業網壇後，十七歲便贏得大滿貫男單冠軍，勢如破竹，氣勢如虹，不過風光背後，犧牲的是一去不返的童年寶貴光陰。

「當時訓練真係好艱辛，朝早打兩小時網球，再做一小時體能訓練，中午食完飯休息後，打多兩個半小時波，再做一個半小時體能訓練，一星期訓練六日，放得一日假。比賽前仲要控制飲食，所以我每日返到屋企都會好攰，生活嘅循環就係健身、打網球，同休息，練到隻腳有好多傷患。就算直到o依家，雖然只係做咗日本網球手錦織圭嘅教練，但平時因為屋企有小朋友嘅關係，都好難有足夠嘅睡眠，分分鐘少過比賽嗰陣。」

做運動員好多時都有財政負擔，但他笑言當年好彩，有品牌贊助：「頭一年我表現好好，當時已經排行全球第三十二名，REEBOK贊助我，所以打後我都無財政上嘅壓力。」

張德培近日來港出席活動，並親自指導小朋友打網球。

名利雙收

名氣和實力都用汗水和時間換回來，十七歲已踏上職業顛峰的他，名利雙收，不過名氣愈大，壓力亦愈大。「我曾經覺得，作為第一個大滿貫男單冠軍嘅華人，要承受好大壓力，尤其係我後生嗰陣，有一段時間我好有信心喺香港贏比賽，但點知次次都輸，最後只能入到總決賽或者四強，我諗極都唔明，點解每次都失敗，就算現場已經好多人撐你，全場為你而歡呼，但到最後都係輸。後尾我諗通咗，其實無論我贏定輸，香港人都會撐你，繼續拍手支持你，將呢種壓力變成一種積極，睇開咗之後，成件事容易咗好多，識得享受比賽過程，之後就贏番啲比賽。」

張德培難得來港，不少學生拿着網球，爭相上前索簽名。