為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2016 年 12 月 20 日

無綫前高層爆《歡樂滿東華》秘聞

無綫剛啱舉行完一年一度大型籌款節目《歡樂滿東華》,呢個有三十幾年歷史嘅節目,除咗籌得嘅善款戰績彪炳之外,當中仲有唔少鮮為人知嘅內幕同秘聞。早排,三位無綫前高層,包括:劉天賜、金廣誠同何麗全,就難得喺電台節目裏面爆響口話當年。

東姑覺得以下呢幾單料都幾嘖嘖稱奇,一於拎出嚟同大家分享吓!

講起《東華》當然唔可以唔提祥哥新馬師曾,佢地位舉足輕重,所以每年節目之前,無綫高層連同一眾東華主席、總理等等,就會約埋出嚟食飯,一來係象徵式邀請祥哥,二來係商討節目表演嘅項目。劉天賜喺節目講笑咁話,年年呢餐飯,祥哥都會講番佢以前喺北角舞廳嘅艷遇,年年如是,如是者,年年聽一次。劉天賜又爆料話,祥哥地位超然,咁多年嚟,只有佢一個表演嘉賓,可以享受無綫提供嘅特別待遇,會為佢特設一間私家房休息,裏面有埋私家牀,畀佢用嚟瞓覺,同埋食下「補品」咁,養足中氣再出場唱戲。

一班前無綫高層大爆,原來吳剛喺《東華》玩滾油係easy job,因為加咗硼砂只係睇落高溫,實際得五、六十度。

 

年年為《東華》義唱籌款嘅新馬師曾地位超然,唯一佢有私家房休息,仲有牀畀佢瞓,同埋食下「補品」。

嗰陣時為咗《東華》嘅表演項目,幕後扭盡六壬去度橋,最經典有肥姐(沈澱霞)踩雞蛋、黃霑踩火炭、吳剛師傅玩滾油等等。佢哋爆呢啲項目全部都有竅妙,踩蛋只要攞啱個平衡位;踩炭只要心無雜念,一口氣行過去就可以。三人異口同聲激讚肥姐、霑叔勇於嘗試;反而滾油只係睇起上嚟危險,其實落咗硼砂,觀眾睇落好似好滾,其實只得五、六十度溫度。

八十年代寶詠琴曾任《東華》主席, 佢一片孝心,專誠搵潮州班唱戲,畀當時嘅奶奶欣賞。

 

肥姐踩雞蛋為《東華》籌款相當經典,原來只要攞到個平衡位,啲蛋就唔會爛。

而唔少紅星都為《東華》出過力,謝霆鋒當年仲係o靚仔時,就同媽咪狄波拉玩gimmick,母子演出幪眼踩鋼線;王菲又試過一邊唱〈容易受傷的女人〉,一邊將隻手放入去蜂巢箱度,呢啲往事時至今日,都仲講到津津有味。

驚險項目當中,唔可以唔提楊盼盼,因為佢係女武師出身,身手好,所以每年驚險項目都由佢孭飛。幾個前高層記得有一年,楊盼盼有一個半空危險表演項目,事前大家商量好晒會吊威吔,點知楊盼盼臨場突然間唔戴。劉天賜話當時因為直播出街,惟有硬住頭皮畀佢去冒險,好彩事後安然無恙。劉天賜坦言楊盼盼當年係藝高人膽大,對自己充滿信心喎!

霆鋒曾為《東華》表演凌空行鋼索及為獅頭點睛。

 

當年王菲都肯幫《東華》賣命,邊唱〈容易受傷的女人〉,邊插手入蜜蜂箱。

 

楊盼盼藝高人膽大,忽然玩命,現場臨時「反口」唔吊威吔,嚇死班高層。

《東華》咁多屆主席總理,劉鑾雄已故前妻寶詠琴都做過,劉天賜喺節目裏面大讚寶詠琴有孝心,專誠請潮州班劇團同大老倌演出,原來係為咗畀奶奶欣賞。而邀請潮州班嘅費用仲全部由寶詠琴負責,大家睇粵劇睇得多,嗰年難得睇到潮劇,反應仲好好添!