為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 12 月 14 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

永不說永不 變幻原是永恆

今年環球政治出現一連串反傳統嘅現象,繼杜特爾特(下圖)(Rodrigo Duterte)當選菲律賓總統,然後台灣出現首位女總統蔡英文,之後英國脫毆首相卡梅倫(David Cameron)辭職下台,再而美國有特朗普(Donald Trump)當選總統,至最近意大利總理馬特奧.倫齊(Matteo Renzi)輸咗公投宣布將會辭職,所有跡象都顯示出唔同地方嘅選民都希望民生有改變(change),呢啲反抗傳統制度秩序,希望社會有所改變嘅政治訴求喺全世界正不斷開展,越嚟越多要求民主民粹嘅聲音不斷蔓延到每個角落,今次意大利公投就更被視作有歐洲反建制風潮嘅指標作用。

有人可能會講今次意大利公投唔應該等同早前英國脫歐嘅公投,部分反對倫齊改革嘅其實係支持歐盟,不過佢嘅辭職就好可能提早引發選舉,有人擔心反建制政黨更有機會贏大選,從而令全球市場多少都會受到影響,以今年反傳統嘅政治思維去推算,咩事都有可能發生。美國現任總統奧巴馬(Barack Obama)競選時曾經講過好多金句,我比較印象深刻嘅有一句,「We are the Change that we seek」,我好贊同我哋就係自己所要尋求嘅改變,唔知你哋又點睇。

2016年環球政治出現甚多反傳統現象, 各位讀者要緊記政治跟經濟民生息息相關,建議投資時要採取 「戒急用忍」的策略。

講番特朗普嘅當選,投票畀佢嘅選民有差唔多一半持有學位,接近一半係年薪高過五萬美元嘅打工仔,點解呢班人會投佢票?我有幾位美國朋友就講話之前民主黨勝出嘅奧巴馬,同再之前共和黨勝出嘅小布殊(George W Bush),佢哋喺實則經濟效益嘅表現上,反映唔到去日常生活嘅民生度,有部分選民根本對兩黨嘅表現都唔滿意,所以喺呢班選民當中,如果唔投白票嘅就會好激咁去揀個政治素人特朗普出嚟,選民最終都係希望喺現有社會制度同民生上有所改變。

其實喺唔同嘅年代(decade)或者時代(era),改變會不知不覺間出現喺我哋唔同生活嘅層面上,改變仲有多種唔同嘅特質,更會不斷重複咁喺唔同嘅時間出現,就好似從前盟軍贏第二次世界大戰係靠加密謎碼機(enigma)嘅發明同出現傳遞訊息,蘋果公司(Apple)產品嘅出現大大改變果迷同我哋嘅日常消費同生活模式,我哋由從前嘅科網進入互聯網再進入大數據時代,科技日新月異不斷進展,人類嘅文明物質生活亦不斷進步,流行歌仔都有得唱「知否世事常變,變幻原是永恆」,當中包括嘅種種改變就係跟着唔同年代同時代嘅變遷而有所改變。

現任教宗方濟各(Pope Francis)曾經講過「We Are Not Living an Era of Change but a change of Era」我同意改變係因為時代嘅變化而令我哋因而有所改變。最近社會上出現咗好多要求改變嘅聲音,我認為每個人都可以要求改變,每個人要求嘅改變可能不盡相同,但改變其實無分對或錯,我誠心希望社會無論出現有咩改變嘅訴求,策劃同執行訴求嘅人應該係以建基香港嘅福祉為依歸,務必緊記政治同經濟同民生絕對息息相關一環扣一環,投資股票有時係需要「戒急用忍」,將之用喺我哋要求改變嘅訴求上亦未嘗不可囉。