為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2016 年 12 月 08 日

傳梁、游掙扎上訴 支持者斥咪打無把握仗

青年新政梁頌恆、游蕙禎嘅宣誓上訴失敗,上周法庭原本安排聆聽會,處理佢哋上訴到終院嘅申請,但兩人以時間太倉卒為由,要求押後一、兩日,但之後無晒下文,而十四日嘅上訴期已經過咗一半,立法會亦已經喺本周一刊憲宣布佢哋議席出缺,唔少人猜測佢哋係咪放棄上訴到終院。

據佢哋團隊嘅法律意見,係未決定是否上訴,不過有消息話,佢哋上周缺席聆聽會真正原因係無錢畀過百萬按金,「終審法院唔係話開庭就開,第一要法庭受理,第二要申請人畀按金。」消息人士亦表示,梁、游兩次官司都敗訴,自決派深知成功翻案嘅機會不大,「如果打落去都敗訴,埋單隨時成千萬,自決派支持者諗緊仲值唔值得再打一場無把握嘅官司?」

加上政府加碼追溯四名立法會議員嘅宣誓爭議,自決派更加唔支持佢哋打落去,「有聲音認為,應該集中資源幫其他議員,尤其是劉小麗,因為佢仲有得打,如果贏咗其餘三個議員嘅勝算更大,好過嘥資源落梁、游身上。」

但消息人士指,梁、游本人仲心有不甘,遲遲未肯放棄。據悉,佢哋認為唔打落去,就要即時清付訟費及「回水」畀立法會,反而打落去仲可以博一鋪贏咗唔使孭條數,仲有番議席。

消息人士透露,「佢哋認為終審法院大部分非常任法官係外籍人士,睇法同本地法官會唔同,終院一旦開庭,會有五個法官一齊審,被編中由外籍法官審理嘅機會好大,話唔定有機會翻案。」

不過,始終錢係佢哋最大考慮,兩人近排發起網上眾籌,到o依家只籌得三十幾萬元,同佢哋孭緊條數差成大截。有法律界人士估計,梁、游上次於原訟庭敗訴,已經要孭五百幾萬訟費,加埋輸咗上訴,訟費再加多二百幾萬元。如果再上訴至終院,一旦敗訴隨時孭多二、三百萬元,連同立法會追討兩人薪金及預支辦事處營運資金嘅一百八十六萬元,估計梁、游如果「終極敗訴」,欠債或逾千萬元。

雖然佢哋預咗破產,但對前途影響好大,破產後唔可以做律師、會計師、銀行、保險等專業,亦唔做得上市公司董事,人壽保險都可能斷埋。

梁、游二人仍未決定是否上訴,但自決派就想將資源放喺劉小麗等四人身上。

 

資深大律師戴啟思(右)及潘熙(左)代表梁、游打官司,就算收順啲,但梁、游仍要孭起政府巨額訟費。