江美儀剝蝦時嘆「自甘墮落」激嬲網民

由麥長青（麥包）、滕麗名、江美儀及顧紀筠阿仔陳浚霆（Andrew）主持的《街市遊樂團》，介紹各區街市的風情。不過網民就唔多Like主持人之一的江美儀，覺得佢在節目中說話令人難堪，對新人Andrew又頗為刻薄。

以最新一集為例，眾主持介紹長洲街市，一向「牙尖嘴利」的江美儀語出驚人，先戥魚檔劏魚辛苦。體驗剝蝦曬蝦乾時，竟在魚檔檔主面前爆出一句：「我哋日日吃喝玩樂，麻雀耍樂，而家喺到做咩？自甘墮落。」令阿滕都似乎睇唔過眼打圓場說：「又唔好話自甘墮落。」網民見狀即嬲嬲豬指江美儀「可唔可以尊重吓人？」又認為「社會有高層之餘總要有基層」。

雖則Andrew做新人，身處「下靶位」係正常事，但係見住江美儀幾乎集集都露出炆樣向Andrew喝「行開啦你」，網民都質疑為節目效果又未必要去到「無品」的地步，甚至話「集集見佢鬧個後生仔（Andrew），聽到就覺好煩。」