陳小春唔敢同老婆硬碰

陳小春同應采兒（丁丁）呢對都算係圈中嘅潮爆夫妻，兩個都咁盞鬼認真夾到絕，仲經常喺社交網放吓閃，晒吓恩愛添。難怪，最近就有珠寶商睇中佢哋，重金請佢兩個夫妻檔賣廣告啦！

東姑率先睇過未出街嘅廣告片同花絮片段，差啲就畀小春同丁丁兩公婆嘅sweet、sweet閃盲！兩人完全寓拍攝於耍花槍，無論鏡頭前後都咁冧滋滋。有幾個鏡頭仲話，小春當正老婆女皇咁服侍；其實，東姑聽聞現實生活中，小春的確畀老婆「食住」，絕對係一個廿四孝老公。

而最骨痺莫過於喺鏡頭面前，小春大談夫妻相處之道，意思大概係佢點樣就晒老婆，老婆永遠是對的。小春更加揸住兩個拳頭對住鏡頭話：「娶老婆返嚟錫，同佢硬碰硬，永遠自己蝕底。」又話當初第一眼見到老婆，就已經畀佢笑容感動、迷住咗喎。東姑聽到毛孔都不受控咁擴張，呢對夫妻肆意放閃搵錢，真係唔識理人感受喇！

小春與丁丁，兩公婆都係盞鬼玩得之人，跳探戈跳到調轉，由丁丁抱實老公。

揸住兩個拳頭嘅小春對住鏡頭話：「娶老婆返嚟錫，同佢硬碰硬，永遠自己蝕底。」

喺廣告度，小春做番平時嘅自己，當老婆係女皇咁服侍。

兩公婆寓拍廣告於拍拖，跳舞跳到超忘我，投入二人世界之中。

喺鏡頭背後，小春同丁丁都不停冧滋滋咬耳仔，佢唔知講乜

兩公婆同埋囝囝小春子（Jasper）一家三口，幸福到痺。