為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2016 年 11 月 17 日

馬浚偉隊龜膏降火

好多人睇過馬浚偉(馬仔)嗰齣《偶然.徐志摩》舞台劇都like爆,又話有牀戲,又話有咀戲,講到咁火辣辣,東姑點可以錯過,即刻去撲飛。原來係真o架!歷時三個鐘嘅舞台劇,幾位主角完全冇甩漏,果然係精采絕倫。其實,女主角萬綺雯(蚊蚊)為咗演陸小曼,都犧牲好大,除咗推咗無綫套《老表3》之餘;為咗演好啲,佢之前仲跟戲曲老師趙鳳儀學崑曲。演員咁用心,點都值回票價啦!

馬仔喺九三年入行,而蚊蚊就八九年入行,所以兩人喺圈中都儲埋唔少好朋友,今次都有嚟捧場,令到台下一樣吸睛。喺中場休息時,醒目嘅東姑就以九秒九衝去廁所,避過排隊一劫,不過張文慈同余慕蓮(魚毛)就冇咁好彩嘞。女廁條人龍長達四十人,魚毛都好彩有班師奶friend同佢吹下水,而孤獨排隊嘅張文慈,就好無聊同好無奈。最後,當快將要入場嘅時候,竟然又畀東姑見到黃日華,佢老婆好鬼醒呀,等所有人都去晒廁所,佢先衝入去,而身為好老公嘅華哥,就幫老婆拎手袋,非常之體貼。

散場之後,最重要嘅一環,梗係入後台搵男女主角「集郵」啦! 當晚後台非常之墟冚,逼到水洩不通,歐陽震華帶埋老婆嚟捧女主角場,令到蚊蚊開心到差啲流眼淚。而東姑仲有大發現,喺一眾演員嘅休息室,擺放咗大量龜苓膏及火麻仁,睇嚟佢哋為咗呢個舞台劇通宵達旦背台詞,搞到心火盛, 出場前要清一清濕熱,務求以最佳狀態示人,老闆馬仔果然識做。

無綫資深監製潘嘉德睇完馬仔嘅《偶然.徐志摩》舞台劇,都直竪拇指話like。

 

蚊蚊見到歐陽震華帶埋老婆嚟捧場,非常之開心,仲笑到見牙唔見眼,最後更加有啲眼濕濕。

 

為咗演好呢齣舞台劇,蚊蚊之前仲跟戲曲老師趙鳳儀學崑曲添。

 

東姑發現,喺後台有大量龜苓膏及火麻仁,睇嚟馬仔同班演員都演得幾燥吓。