一段把〈PPAP〉二次創作成〈PPAP學廣東話〉的MV片，才兩、三日，便有二百多萬點擊率，令搞作者黃建東一夜間成為了網絡紅人。「post片嗰晚，我返去（無綫）拍《我瞞結婚了》，（黃）翠如、洪永城同啲工作人員都同我講：『今次你掂啦！』邊有咁快呀？」

 

而事實上，這天他在銅鑼灣鬧市拍照時，有女途人一直用手機離遠拍着他；有推車仔的速遞員跟他笑說：『pork lego guy！chi ma gun！』一名婦人經過他身旁時又為他打氣：『黃生，加油呀！』到他換上了MV中那套唐裝衫後，所經之處，學生妹、學生哥、年輕媽媽、外國人、叔叔、師奶個個也爭着要和他合照（如下圖）。「原來畀人認識、畀到人歡樂，係咁開心、咁滿足！」

所以，這天他說了很多很多次「感恩」、「感謝」和「好開心」，多得連他自己也有些不好意思：「好長氣呀我！我第一次有咁嘅機會去講自己嘅嘢……」話語間既戥他高興，但又不難感受到那份無奈，畢竟他選「香港先生」入行五年來，無論表現多努力，彷彿也得不到真正的賞識。「我唔靚仔、唔型又唔charm，一直以嚟，好似好難畀人見到我同記得我，我好似好冇觀眾緣。」

說起來，還是黃偉文十一年前為陳奕迅寫的〈浮誇〉有先見之明：「人潮內愈文靜愈變得不受理睬，自己要搞出意外……」

 

 

格晒價

只要有創意，成本是其次，黃建東自家製作的〈PPAP學廣東話〉，由構思廣東話粗口諧音的詞，至服裝、道具、拍攝和剪片，由始至終都只有他和一位朋友搞掂晒。

「我嗰排見〈PPAP〉咁hit，好多藝人都惡搞，我都想拍番條片，但我唔想一樣歌詞，諗吓諗吓，就諗到用粗口諧音，我知好踩界，但條片裏面，全部都只係英文字，我冇講過粗口o架！哈哈！」

片中那套唐裝衫，是他收藏了十多年的羅湖城貨色。「學廣東話，咪着唐裝囉！我喺美國讀大學嗰陣，學校要我哋有一套自己國家嘅衫，我阿媽就帶咗我去羅湖城格晒價咁買，百幾蚊，我就一直keep到o依家，唔捨得揼。

「啲豬肉、滷味，我都係拍嗰日之前去街市買，本來我想買嚿豬肉，但要八十蚊，好貴，見到十八蚊嚿豬腳喎！買！然後見滷水鵝半隻都百幾蚊，咪買嚿豬耳囉，十蚊咋喎，搭埋條豬腸都係廿八蚊咋！」

最後兩條友在荃灣海濱公園拍攝，拍了個半鐘，花了兩日剪片便放上網。「我冇諗過有咁好嘅反應，我最開心嘅，唔係嗰二百幾萬點擊率，而係啲人讚條片有創意！啲網民嘅留言，令我好窩心！我希望大家藉住呢條片，記得我係黃建東！」

 

去美國

阿東生於小康之家，家中只有他和細佬兩兄弟，父親從事建築材料代理。「佢係個好慳家嘅人，為咗慳一、兩蚊，搭小巴都特登行多一個站先上車。」

他從小已很清楚自己熱愛演藝。「我細個時睇完戲，會對住個窗，講番啲對白出嚟，講到喊；我又因為《孤星淚》鍾意咗musical，好嚮往美國，嗰度有百老匯，又有荷李活，我想中七之後去讀書。」

一次搭巴士時，他把這些心底話告訴父親，就這樣入讀了紐約州立大學的戲劇系。「我去讀書嗰筆錢，本來係阿爸儲嚟換層三房樓嘅首期，結果畀晒我，冇得換屋……」說時，他一臉歉意。「我阿爸阿媽好支持我，就算啲親朋戚友知我去讀戲劇講三講四，佢哋都唔介意。」

畢業後，他在彼邦當過華人電台的DJ，演出過Off-Broadway一些musical，又拍過一些獨立短片和廣告，但當認識了一位美籍華人的uncle後，卻令他萌起了回港的念頭。「個uncle係個五、六十歲嘅演員，佢最勁嗰次係爭到演出《Sex and the City》其中一集，一個只係講幾句對白嘅『花店老闆』角色——亞洲人要喺美國演出嘅競爭太大，機會太少！咁不如我返嚟香港發展先。」

少年黃建東（右）跟年紀相差兩歲的弟弟感情要好，其時的他很明顯是個肥仔。

一家四口相當融洽，「我o依家最想快啲賺到錢，買番層三房樓畀阿爸阿媽。」

十六年前在紐約州立大學修讀戲劇系，畢業後曾在當地工作兩年。