為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 10 月 29 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

突破導路

人生,要有突破嘅勇氣,先會變得更精采。

今次「Paco巨星飯堂」嘅兩位嘉賓:曾國祥(Derek)同周冬雨,都因為電影《七月與安生》,突破自己嘅框框。Derek處男執導,冬雨就喺戲中一改「靜態」演出,令二人獲得認同,獲提名台灣金馬獎,分別競逐「最佳導演」同「最佳女主角」。

我特別邀請佢哋,去到位於尖沙咀嘅「Harlan's」,品嘗特色西菜,大談呢股尋求突破嘅勇氣。

面對無敵嘅維港夜景,特別訪港為電影《七月與安生》宣傳嘅冬雨,相當興奮;而首次執導嘅Derek,就大讚呢位女主角肯突破演出。

 

我帶兩位嘉賓去到位於尖沙咀嘅「Harlan's」,品嘗特色西菜,大談電影經。

 

恩師指點

一般人會標籤Derek為「曾志偉個仔」,但其實佢喺電影界,唔止星二代咁簡單。喺佢37歲入行初期,就喺陳可辛(Peter)公司做打雜,默默耕耘幾年先往外闖,今次《七月與安生》就係Derek同佢嘅啟蒙老師陳可辛合作嘅成果。「我讀完大學就喺Peter公司打雜,做阿四做咗好多年。離開咗咁多年,我做演員又做過導演,Peter一直話不如搵部戲一齊合作,但係傾咗四、五年都未搵到好啱嘅project。

「直到舊年年頭,佢打畀我話手頭上有個好好嘅古仔,我先至第一次接觸《七月》呢本小說,知道原來有個叫安妮寶貝嘅作家,係同韓寒、郭敬明同期。原來好多八十後嘅女仔,佢哋成長係睇呢本書大。我開頭淨係覺得小說好睇,唔知呢本書影響力咁大,拍戲拍咗一半,好多書迷喺微博留言畀我,仲叫我唔好破壞佢哋嘅青春回憶⋯⋯我覺得呢啲係緣份嚟嘅,同Peter係緣份,同呢個古仔都係緣份。與其話我去搵呢個project,不如話係呢個project搵到我,每套戲有佢嘅命。

「Peter對製作每一關都把得好緊,不過喺拍攝方面,陳可辛好放手,唔太干預我。反而我始終對內地市場唔係好認識,我學得最多,係Peter對包裝對宣傳真係好出色,特別有佢嘅一套!」

跟陳可辛學到嘢,自己做導演又賺到咁好口碑,所以我都特別為Derek高興。「票房唔係最重要,我哋套戲口碑真係好好,我最開心係好多觀眾話,見到戲入面兩個女仔由十三歲相識到三十歲,十幾年間各有經歷,佢哋嘅成長就好似一塊鏡,搵到自己影子,好多人話好易代入感動到喊⋯⋯先係最值得高興嘅!」

 

 

初次執導嘅Derek,喺恩師陳可辛(右圖左二)嘅監督之下,完成呢部新作,展現佢嘅才華。

 

雞尾酒Mango Tree($138)嘅顏色同冬雨嘅晚裝一樣咁悅目,入口有淡淡嘅芒果香,夠晒解渴。

 

西班牙復古番茄、火箭菜配意大利黑醋($268),帶酸嘅前菜特別開胃。

 

意式龍蝦湯($168),鮮味既香且濃。

 

選角風雲

我成日話,真正主宰電影嘅成功,係導演同劇本,選角成功都要歸功導演嘅眼光。戲中飾演「安生」嘅冬雨,同飾演「七月」嘅馬思純,都係具氣質嘅新生代演員,佢哋仲雙雙入圍競逐「金馬影后」,原來喺選角上,Derek的確花過心思。

「冬雨真係好有靈氣!一開始另外一位監製JoJo(許月珍)畀咗個List我,問我特別想同邊個演員合作,我就諗起周冬雨!不過本來我係諗住由佢演比較靜嘅『七月』,因為我之前睇佢啲戲,佢都係演比較文靜、溫馴嘅角色,但係到見到冬雨真人,同佢傾偈,先知道佢其實好man好爽,反而係一個『安生』。

「選角嗰陣,馬思純咁啱有套電影喺內地好紅,叫《左耳》,佢表現得好好,就成為我另一個女主角人選。原著『七月』係按部就班嘅人,『安生』就好反叛,我估唔到現實中反而相反,周冬雨古靈精怪、馬思純就好斯文。所以我就調轉原本嘅計劃,安排周冬雨做安生、馬思純做七月,對演員係挑戰,對觀眾都好有新鮮感。」

處男作嘅成功,令力邀Derek執導嘅電影人接踵而至,機會在眼前,佢話要諗清楚自己嘅未來路向為先,所以正小心挑選劇本。

 

 

 

電影嘅故事講述兩個女孩子嘅友情,兩位女主角:冬雨同馬思純,需要由十幾歲演到近三十歲,仲雙雙入圍《第53屆金馬獎》嘅「最佳女主角」提名名單,角逐影后殊榮。

 

烤澳洲羊架配南瓜、菠菜及陳醋汁($438),嫩滑嘅羊肉令人再三回味。

 

煎海鱸魚配小墨魚、番茄及墨魚汁($438),清淡嘅海鱸同味道濃郁嘅墨魚汁,配合得天衣無縫。

 

最愛靚湯

Derek對自己嘅團隊有讚冇彈,冬雨亦感謝導演令佢有演技突破。「一看劇本,我已經很喜歡『安生』這個角色,她跟我之前演的角色完全不同,但又有些和我本人很像的性格,演起來很爽!說起來,還是要感謝導演給我這個機會。」

以電影首度入圍金馬影后,雖然話冬雨嘅角色比較古靈精怪,但係亦需要感性演出,佢話:「我只能真哭去演出要哭的戲,但馬思純是好對手,讓我不需要醞釀。但拍完了以後,我比較玻璃心,下戲要馬上找人聊天,去回復正常的情緒。 」

今次冬雨訪港,全因新戲,佢話每次來港,都特別期待一樣嘢。「我很喜歡香港的湯水,任何一間飯店或餐廳的也可以,因為我的身體比較弱,喝湯來進補就最好,任何湯水也可以!」

外表柔弱嘅冬雨,其實性格豪爽,所以係活潑開朗嘅「安生」嘅不二之選。

 

兩位女主角因同時愛上男主角而陷入友情危機,Derek挑選咗嚟自台灣嘅李程彬,演出呢個重要人物。

 

意大利飯配野菌黑松露($388),每一口都係黑松露嘅清香。

 

手製意大利麵配阿拉斯加蟹肉及刁草忌廉汁($388),鮮甜嘅蟹肉同醬汁match得啱啱好。

 

甜品係The Chocolate Dome($148),外表精緻,每啖都係香濃嘅朱古力mousse。

 

Harlan's
地址:尖沙咀彌敦道100號The ONE 19樓
電話:29722222