為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 理財  > 投資攻略 2016 年 10 月 29 日

誤信貼士 搞網狙擊名嘴 神秘IT男揭財演「戰績」

散戶每日在股海淘金,一眾財經演員成了不少股民的明燈,緊隨他們的推介入市。但有多少股壇名嘴的貼士,能夠長線賺錢?

熱愛炒股的「IT男」Eric接受本刊專訪,自稱因誤信股評人的「山埃」貼士輸大錢,兩年多前憤而創立「論盡股評人」網站,搜集城中多位股壇名嘴的專欄,然後統計其推介股票的回報表現,希望幫自己和散戶趨吉避凶。

經過三年日以繼夜埋首統計,他發現金魚缸根本無必勝貼士,只有避開老千股的心得,就是「多人推介唔好買!」

不少港人愛炒股,投資講座和講股節目多不勝數,造就一批財經名嘴成為散戶的股海明燈。

炒股多年的Eric,自爆跟財演貼士買過不少「山埃股」中伏,印象最深要數已故「日本股神」邱永漢的推介。「當年有隻亨泰(0197),好多名嘴推介過,連邱永漢都喺雜誌推介,最終蝕足九成!」

誤信貼士「輸鑊甘」,Eric憤而興起搞網站追蹤財演「戰績」的念頭。「名嘴日日喺報紙電台推介股票,但從來冇人統計好唔好。」然而正如將「世上跑得最快的人」的標準改為五十米,飛人大概不是保特;用甚麼標準統計一眾財演的推介表現,難免惹來爭議。

Eric認為即使沒有絕對客觀標準,統計依然值得散戶參考。「大學都有排行榜,餐廳亦有『米之蓮』,點解股評人唔可以?米之蓮其實好主觀,但股評人推介升就係升,一睇就知!」

 

驚「尋仇」不出鏡

他跟團隊主要追蹤各大媒體約三十六個股評專欄,每天模擬用一千元按股評人的建議買入價掃入「貼士股」,並跟隨其預設的目標價或止蝕價賣出。「如果某名嘴推介時冇講明買入同止蝕價等,就唔會計入排行榜。」

Eric接受訪問時堅拒出鏡,原因是網站力求公正客觀,難免會得罪人。兩年前他開始發表統計後,旋即吸引不少股評人留意,有財演甚至約他出來見面。「有位表現較差嘅股評人約我出嚟,我專登搵間好開揚又容易甩身嘅餐廳,驚佢真係『泵』我!」原來該股評人只是想與他商討合作,但最終沒有成事。
又有一次,某股評人約他「講數」,自辯自己在某專欄推介的股票,大部分都是「炒一日」,要求他不要計算該專欄的貼士。Eric不屑道︰「我心諗你又冇喺專欄提出,散戶睇報紙根本唔知,所以一樣照計!」

他尤愛針對累人輸錢的財演,有時更會在名嘴的facebook上留言「挑機」。「好似有個網上股評人『施凌』,早一、兩年推介嘅表現麻麻,於是我喺佢fb以『論盡股評人』名義留言,希望引發其他股民談論。」

雖然施凌沒有直接回應質疑,但Eric發現對方去年的推介「回勇」,「唔知係咪喺我嘅鞭策下,佢嘅推介大有改善!」

據Eric觀察,戰績較差的財演都有一個共通點,就是經常推介大上大落的細價股。「就算推介咗第二日即刻升,未到佢預設嘅目標價都當繼續揸住,呢啲股份炒完一轉後,好多都大幅回落,影響投資表現。」

IT男Eric怕被人點相堅拒出鏡。他追蹤各大媒體約三十六個股評專欄,自言英雄狗熊立即現形。

 

多人推散戶要彈開

研究財演戰績數年,Eric直言仍未發現世上有「必賺方程式」,卻悟出一些避開「老千股」的心得。「根本冇名嘴可以長勝。股民上網站睇吓近一個月、三個月十大跌幅或出現『極端』表現嘅股票有乜人推介過,會發現來來去去都係嗰班人!股民想長線投資,就要避開佢哋推介嘅股份。」

此外,有些上市公司的現金減去負債之後,比市值還要高,表面上十分「抵買」,但原來只是財技股,就要份外小心。

「我揀細價股,會揀啲少人搞搞震兼真係有資產嘅。例如安寧(0128),年頭股價三毫幾,每股淨現金都有三毫八,見冇乜名嘴推介過就試吓買,九月升到四毫六左右放,賺咗三成幾。」

雖然統計不一定盡如人意,Eric說希望網站提供更多資訊,幫散戶避開老千股。「針對大部分老千股嘅特質,我哋想喺網站統計供股、拆股、合股同改名最頻繁嘅公司,希望幫股民趨吉避凶。」

本刊翻查Eric網站的統計數據,發現由一四年至今,證券界老行尊胡志偉居然排在榜首。能力壓群雄,這名贏家自爆一向推介有長線投資價值的股份,未必即時大升,所以不會很多人留意。「其他名嘴推介嘅,最好呢頭講嗰頭升,但我冇乜限制,可以寫啲未被人發掘嘅股票。」

近年佳作,他自爆差不多是第一個推介阿信屋(0759)的股評人,一二年八月約三角多時已建議買入。「推介之前我親自上去搵老闆林生,發覺佢個生意係work,走去外地搵貨源,打破大集團壟斷,靠遲找數去賺資金周轉,加上廠佬思維,賺微利以量取勝。」另一隻代表作是早年低潮時推介電視廣播(0511),股價自低位反彈不少。

Eric自爆早前跟已故「日本股神」邱永漢的推介炒亨泰,結果輸足九成。