為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2016 年 10 月 27 日

「超級中間人」陳沛然 成流會關鍵

為力阻兩位青年新政準立法會議員再次宣誓,建制派上周三發動流會,令泛民無晒符。被指係「超級中間人」嘅醫學界立法會議員陳沛然,喺行動中嘅角色最曖昧,但又幾關鍵。佢加入咗兩邊陣營嘅whatsapp群組,事前知道建制派有秘密行動,最後雖然無跟大隊行動,但亦無向泛民通風報信。呢種唔參與又唔篤爆行動嘅取態,令政界人士嘖嘖稱奇。

「開會前,有議員同佢講明會發動流會,希望佢支持。」有建制中人話直到最後一刻仍積極游說佢,但佢毫不動搖。最奇係之後泛民、建制回應流會的記者會,佢都係無影。有泛民中人就話,現在仍搞不清佢是敵是友,「唔敢講佢係支持民主派。」

同樣係醫生嘅公民黨議員郭家麒解釋,醫學界正處於世代交替,「好多老行尊都係深紅,政治立場較保守。但後生醫生基本上都係非建制,當老一輩退落來,非建制嘅醫生就變成大多數,陳沛然唔想得失任何一邊嘅人。」

有資深醫生就話:「始終佢四十歲未出頭,資歷仲淺,要睇住上面好多大佬嘅眉頭眼額。」佢又話陳沛然之所以當選,多少係因為佢「氹得掂班大佬」,「佢係一個好識得計算嘅人,政治手腕圓滑,好適合做政治人。」

有醫學界人士分析,選前自稱「中間偏黃」嘅陳沛然,喺選舉期間得到黃、藍陣營嘅醫生選民支持。「另一名候選人黃以謙擺明係建制,黃絲選民惟有揀陳沛然。但另方面,部分醫生覺得陳沛然其實暗藍,所以又有藍絲支持者。」消息人士續解釋,微生物專家何柏良原來有意出選,「聽講何柏良曾經力勸陳沛然退選,但最後唔成功。計過度過發現自己吸票無陳沛然咁多,最後索性唔參選。」

該名消息人士續指,陳沛然一向同醫管局有偈傾,業界覺得佢唔會好似上屆醫學界議員騮哥企得咁硬淨。到底呢位「中間人」係黃底還是藍底?相信好快揭曉,事關醫委會改革即將再上馬,到時佢不得不表態。

姚松炎宣誓期間,建制派拉大隊離場,陳沛然卻未有參與。

 

被指係中間人嘅陳沛然雖然知道晒建制派嘅秘密行動,但無向泛民通水,使流會戰順利進行。

 

何柏良(前左一)本來有機會出選立會,但始終唔及陳沛然(前左二)吸盡藍、黃陣營嘅票源。何唔打無把握嘅仗,最後決定唔選。