為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 10 月 27 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

尊重他人=尊重自己

識我嘅人都知,我好少講政治,但係近日不時聽到今個月十二號新一屆立法會議員「更改誓詞」,同埋今個月十九號立法會流會嘅熱烈討論,確實觸動咗我嘅神經,的確有需要借今期抒發吓。近年,唔同層次嘅社會撕裂不斷湧現香港,有唔少人認為係現屆政府施政失當,我理解有市民想有反對嘅聲音喺議會屬正常,但整件事上最令我感到不恥嘅係,當新晉準議員回應傳媒時嗰種嬉皮笑臉嘅態度,同埋錯讀「支那」視作因為地方口音、幼稚不堪博出位嘅言論嗰時,我就會諗佢哋係咪想挑戰同侮辱普羅大眾嘅智慧呢?

近年都有聽到從唔同界別年輕人嘅發聲,似乎字裏行間都流露出佢哋想話「阿叔,你地OUTo架啦,世界已經唔同咗喇」,我其實係絕對支持言論自由,亦同意每個人都可以有唔同觀點角度,我哋可以唔滿意政府,我哋可以唔滿意建制,我哋可以唔同泛民同路,但反對歸反對,最多咪道不同不相為謀,但我哋做咩事都應該要有「底線」,我哋要識得尊重他人,仲應該要識得咩叫自重,更加唔可以任性地想點就點,連基本尊重都唔識嘅人,枉談民主,更遑論建功立業。

o依家嘅年輕人,可能生於太平盛世,無經過太多悲慘歲月,但對一啲有經歷嘅上一代又或者民族意識強嘅港人,國家對佢哋嚟講相當重要。雖然我都無經歷過三年零八個月嘅戰爭歲月,但年輕時都有聽過長輩分享佢哋當年切膚之痛嘅經歷,就當我哋新晉準議員對歷史認識唔深,亦當佢哋抱着「關我咩事」嘅心態,但點都應該會知道「支那」嘅含義,又或者唔識點解就唔好亂用,我認為對人對事都要講基本尊重,做咩事都要顧及其他人嘅感受。

不過有時我都好唔明白,有啲人不斷喺社會上講人權、講法治,但當呢啲人要搞破壞嘅時候,就會挑戰既有法律,當呢啲人涉及自身利益嘅時候,就又會要求法律去保護佢哋。香港之所以有今日嘅成就,除咗講民主自由外,其中重要嘅係港人遵守法治同契約精神,任何一種宣誓,都係契約嘅一部分,如果唔係喺現行法制下,點解發假誓係觸犯刑事哩,如果唔係就個個發誓都當食生菜啦!今次「問題宣誓」雖然無涉及發假誓,但要成為立法會議員,要完成宣誓係必須嘅,如果喺宣誓時亂噏廿四,又加插一啲侮辱嘅字眼都可以過關嘅話,未來個個就有樣學樣,我相信社會就必大亂,好坦白講,要將香港未來交託畀佢哋,後果真係唔敢想像。

有啲人利用出位嘅言論同行為,去博取其他人嘅支持同掌聲,有啲人睇到以為咁做「好型」,以為咁做就係成功上位路,但大家不妨諗吓,又或者試吓,如果喺學校同職場上,做一啲、同講一啲出位嘅行為同言論,我可以好肯定話你知後果自負。世界無論行得點快又或者科技點新,社會雖不斷向前又不斷進步,社會上有啲基本價值同法則,係唔應該改變同唔可以動搖嘅,孟子曰:「夫人必自侮,然後人侮之」,好值得大家深思。

有新晉準議員擅改誓詞,又以嬉皮笑臉的態度回應傳媒,實在是侮辱普羅大眾的智慧。