陳凱琳（Grace）主演的新劇《巨輪II》，近日被獸父吳岱融強姦的戲引起極大迴響，不但未來奶奶有微言，男友鄭嘉穎也放口風想成家立室，企圖將她私有化。

二人拍拖僅一年多，打得火熱，但自言烹飪麻麻的Grace，日前趁不用開工，即急起直追上堂學整蛋糕，由主食到甜品，都要練得一手好廚藝，為做人妻做足準備。

鄭嘉穎一早視Grace為結婚對象，早前孖住去胡杏兒婚禮收料，他日前還透露阿媽恨抱孫，似隔空向女友逼婚。

男友試味

出道僅三年的Grace，事業愛情兩得意，備受力捧劇接劇外，又跟男友鄭嘉穎的戀情日趨穩定，早已互見家長，不過自言「煮嘢食唔叻」的她，最愛玩煮飯仔傳情，繼炮製情人節大餐外，又於拍拖一周年自製卡通人物Minions蛋糕冧男友。日前工作完畢，她即到觀塘學整餅。

已上了四堂課的她，當日是學整檸檬海綿蛋糕，雖然有導師從旁協助，但由預備材料、打cream、鋪餅底、倒模，到裝飾蛋糕等，她通通一腳踢，手勢純熟，兩小時便完成。事後她直認會帶給男友試食：「味道一定冇問題，但係個賣相爭少少。我第一次做drip cake（淋面蛋糕），真係好難，要抹到啲cream好平均好難，同埋唔知要幾大力唧啲朱古力，o依家好似差唔多長度，但有長有短會靚啲。」

鄭嘉穎喜歡卡通人物Minions，她早前親手雕刻一個Minions糖公仔並製成蛋糕，跟男友慶祝拍拖一周年。

他跟年輕廿二載的Grace拍拖後，行為舉止也變得細路，不時拎住鍾情的Minions公仔影相。

玩煮飯仔

愛入廚的的Grace，自到加拿大升學時，因父母不在身邊，故要為自己和弟弟煮飯，「中學上過烹飪班，但都係好簡單嘅嘢，之後跟食譜試整西餐，識整意大利粉、煎扒之類，都跟過媽咪學煮中菜，但學極都學唔到。」而學整蛋糕主要為冧男友，她說︰「整蛋糕係為興趣，大時大節，可以整畀朋友、男友食，個感覺同係街買好唔同，我諗佢食落去都feel到個心意囉。」

早前她自爆包餃子給男友品嘗，事後鄭嘉穎大讚︰「梗係得，一百分。」而平日二人會行超市買餸，互相煮飯給對方食，Grace還在男友的雪櫃貼上一張心形便條，他冧爆說︰「內容不詳盡講，都是溫馨提示。」雖然拍拖僅年多，他視女方為結婚對象，更已傾過結婚話題，但婚期未定，不過Grace已為做人妻鋪路，不但有意到上海修讀廚藝課程；將來還想開餅店，「我想賣結婚蛋糕，因為一層層，好多花，好靚、好elegant（高貴），心目中係喺觀塘開舖。」

煮得兩手陳凱琳，日前用了兩小時炮製的檸檬海綿蛋糕，事後指要給男友試食，由主食到甜品都撚手，為做人妻鋪路。

Grace把預先溶好的朱古力漿唧在蛋糕面層，小心翼翼地控制朱古力的份量。