為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人專訪 2016 年 10 月 21 日

髮力無邊 Vic Kwan

明星華麗背後,總要靠一班幕後功臣加持,星級髮型師Vic Kwan(關列峰),就憑藉一對巧手,廿一歲開始便成為王菲、劉嘉玲、楊千嬅、張智霖、吳彥祖等巨星的御用髮型師,名字響絕髮型界。

「好多人以為整(明星)個頭,只係就咁紮起啲頭髮,邊個整都一樣,但其實有好多嘢,佢知、我知,你哋唔知!你哋睇唔到佢哋嘅頭形、髮質同髮線係點,要整到佢哋靚,真係好難搞!」

經驗老到的他,對於應付難搞髮型,已經駕輕就熟,適逢今年為他入行二十周年,Vic還首創全港美容美髮手機應用程式「WeCut」,將扮靚服務帶上門,令人人都有機會體驗星級享受。

Vic就連自己的髮型都要靠自己親自操刀:「我好少叫人幫我整頭,最多係我自己幫自己剪咗前半,後面就搵個師傅幫我照住前面剪,咁樣會啱心水啲。」

 

剪錯頭入行

要約Vic做訪問,非要早上十點不可,皆因中午過後,他必排滿密麻麻的booking,根本擠不出半滴時間。「做髮型師首要條件係準時,呢個係最基本,如果我啲assistant(助手)遲到三次一分鐘,再見!你唔好跟我學嘢,就算你幾叻都好,啲星係唔會等你,人哋唔再搵你,你又點會成功?」

曾於London Vidal Sassoon學院深造髮型技術,中五畢業後即投身髮型界的他,最初竟因為被「剪錯頭」,才下定決心做髮型師。

「做髮型師,一嚟因為貪靚,二嚟因為曾幾何時畀人剪到我個頭好核突。以前細個,阿媽好興畀廿蚊我落街剪頭髮,我明明係想剪郭富城同許志安嘅髮型,但次次剪出嚟都好樣衰,我直頭想喊,所以先想做髮型師。中四我已經去髮型屋度做暑期工,周圍打聽呢行邊啲人勁,知道Ben Lee(髮型師李振華)呢個名,於是中五一畢業就唔讀書,去咗佢間IL Colpo度做。」

Vic笑言,自己由「洗頭仔」變做髮型師,其後更成為王菲的御用髮型師,只用了四年時間。

「十八歲一入行,全部都要由低做起,學洗頭、做treatment、整顏色、整highlight、電髮,之後要pass到考試,先可以去學吹頭同剪頭髮。我用咗三、四年時間,算係快o架嘞,有啲要用七、八年時間先做到師傅。

「我跟阿Ben學咗嘢三、四年後,廿一、廿二歲已經負責整王菲,其後又同阿Ben夾份開咗間『why b.and Studio』,嗰時係全盛時期,雖然得兩個人,但我哋已經有王菲、劉嘉玲、關之琳、陳奕迅、徐濠縈、梁漢文、吳彥祖⋯⋯最紅嗰廿個星畀我哋做晒咁滯。三年之後,我再次返番去IL Colpo做,之後又去過中環間Hair Culture做咗七年,輾轉最後都係返嚟呢度(IL Colpo旗下髮型屋ii Alchemy Hair & Nail)。」

Vic(右二)剛剛與王菲(左三)到巴黎出席CÉLINE時裝騷,同行更有化妝師Zing(左二)及形象設計師Titi Kwan(右三)。

 

王菲好難搞

要於行內出名,除了要有實力,還要有一次「代剪」的機會。當年全因師傅阿Ben因事未能到台灣為王菲整頭,才轉由Vic代其出埠,意外獲得表現機會,令他廿一歲便升級成為王菲御用髮型師。

「當年王菲要去台灣拍《再見螢火蟲》MV ,咁啱阿Ben又唔得閒,就由我一個人負責整佢個頭。嗰時我真係好驚,我唔係驚佢本人,因為我junior時已經識得佢,而係驚佢身邊嘅人,因為佢周邊全部都係專業嘅人,好似阿Dee(王菲御用形象設計師Titi Kwan)、(星級化妝師)阿Zing、導演嗰啲。驚係驚佢哋班專業人士嘅眼光,驚自己嘅作品唔好,佢哋唔係批評咁簡單,而係會挑剔你,你要達到佢哋嘅要求係最麻煩,所以我事先做咗好多功課。好彩我由細已經識晒佢哋,對我會friendly啲,但老友還老友,佢哋都唔會憐憫你,都係一樣咁挑剔!」

現時定期會飛往北京替王菲理髮的Vic坦言,每次幫王菲整頭,都非常棘手,他更直言她是最難搞的藝人之一。

「你哋每次見到佢出嚟嘅頭髮都好滑,但其實阿菲好多頭髮,啲髮質又鬈,而且佢頭形好怪,頭骨好方,頭頂兩邊個角好高;佢又鍾意將啲頭髮遮住塊面,所以要幫佢整返圓個頭,真係唔容易。我建議佢剪短頭髮,會有個性啲、型啲,但佢好有主見,話鍾意長髮,唔想剪短,因為佢唔使做嘢嗰時,可以一嘢紮起晒,方便整理,反而短頭髮要set造型,太煩,所以我會整到佢滿意為止!」

生日都要於工作中度過的他,正日獲楊千嬅及一眾工作人員買蛋糕慶生。

 

一四年,劉嘉玲開生日派對,就是Vic為她set頭。「佢好唔鍾意啲頭髮遮住塊面,所以我將佢啲頭髮紮起晒,咁就最襯佢。」