主頁  > 娛樂放題  > 留星語 2016 年 10 月 24 日

一念 陳志雲

陳志雲,大家都愛稱呼他為「志雲大師」,「大師」、「大師」,這些年來嗌得多了,加上他歷來的職銜不是無綫業務總經理,就是商台CEO,難怪外界總視他是個高高在上、嚴肅又認真的人,對他又敬又畏。

而事實上呢?

這天,我說起跟他首次做的訪問,已是一二年的事,他即腦筋急轉彎,講爛gag。「嗰陣我啱啱入商台,仲係『志雲』,未係『智囊』(即現時商台職位:首席智囊),哈哈哈!」話未說完,他自己已經忍不住大笑。

事隔數年,難得幽默感依然,畢竟他的涉貪案官司,至今仍然糾纏,單是律師費已經有排計,得閒無事還要被召出庭,確實折磨。

「你話呢件事我係咪完全冇困擾呢?就假嘅!但事實真係冇得我諗咁多,好多法律嘢我都唔識,我只可以交晒畀專業人士處理,自己平常心去繼續我正常嘅生活,盡量唔畀呢件事影響到——凡事都有兩面o架啦,咁我咪揀正面嗰邊去睇囉!」

一念天堂、一念地獄,大師因為本月底演出舞台劇《莎士對比亞》,所以這天他跟我說了很多很多莎士比亞的事,而且說得相當興奮雀躍——如置身在地獄,他應該沒有這樣的閒情逸致。

 

 

髀罅

一二年跟陳志雲訪問時,他剛上任商台CEO,說要為公司發展新媒體,說得雄心壯志,充滿期待;今天跟我談本月底演出的舞台劇《莎士對比亞》,那雙滿有盼望的「星星眼」,邊說邊在閃呀閃,更開心得口快快把劇名說成《莎士對髀罅》。

「係袁立勳導演透過倪秉郎搵我o架!好有趣嘅係,佢哋搵我之前,我喺個化妝品牌活動度講過,我嘅夢想係做一個專業嘅舞台劇演員,點知真係有呢個機會!我好感謝上帝!

「今年係莎士比亞離世四百周年,我知道好多劇團都有做佢嘅劇,但我哋呢套《莎士對髀罅》,反而係透過佢啲劇目,去了解呢個人,我覺得好有意思!莎士比亞有好多好多嘅謎,例如佢嘅性取向、佢同太太奉子成婚之後分開住,咁佢哋嘅關係係點嘅呢?佢一六一六年離世時,話要將佢第二張最好嘅牀留畀佢太太,咁第一張又留畀邊個呢?我哋套劇就係會……(劇透,下刪五百字)」

這是大師成為公眾人物後,首次演的戲。「我以前都有演過舞台劇,因為我喺港大讀英國語文及比較文學系時,其中一個主修課目就係舞台製作,就算畢咗業,都有參與過一啲舞台劇演出,只係冇呢次咁,一演就係主角,仲要係演莎士比亞喎!」

跟葉童首次合作,他說:「齣劇嘅台前幕後個個都好專業,葉童話我同佢,係佢哋世界裏面嘅一對新人,哈哈哈!」

 

與俞琤(右二)相識逾廿載,關係一直亦師亦友。「我遇到呢個人好幸運,佢教咗好多好多嘢畀我!」

 

讀港大時,他曾參與《城市論壇》,代表學校站上台發表對時事的看法。