為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2016 年 10 月 20 日

元老做超級議助 毓民田少垂簾聽政

今屆立法會個個政黨都話要新舊交替,但近日唔少議會新丁嘅議助名單,就發現好多人都熟口熟面,好似鄭松泰就請咗「教主」、前立法會議員黃毓民出山做佢軍師。自由黨鍾國斌都唔執輸,搵到該黨榮譽主席田北俊做佢「超級議助」。要請得郁呢兩位元老,原來唔使天價人工,因為佢哋都只係以義務顧問嘅形式幫手,分文不收。

有政壇中人解釋,各派今屆出動星級議助團,皆因議會勢力四分五裂,新人未必可以鎮得住大局,於是請元老助陣,「而且做義務議助可以自由出入立法會,做起事上嚟方便得多,仲可以垂簾聽政,繼續掌控議會。」

呢個道理,自決派似乎都非常明白,香港眾志羅冠聰去到盡,請埋眾志發言人黃之鋒做正式議助,名正言順用公帑請「自己友」。本民前嘅梁天琦就做青年新政梁頌恆嘅義務顧問,另外今屆夥拍梁頌恆、排喺名單第二位嘅本民前前成員李東昇,做埋梁頌恆嘅受薪議助。

自決派消息話,除了可以自由進出立法會,萬一要策劃衝擊,就可以嚟一招裏應外合。「搞到立法會秘書處同保安部好大壓力,但又無可奈何。」政壇中人說。

至於原本跟開陳鑑林、曾鈺成等退休議員嘅議助,大部分都留喺黨內做其他當選議員嘅議助,其中民建聯張國鈞就一口氣接收鍾樹根同曾鈺成嘅議助,加埋佢原本兩位助理,足足有成十五人,堪稱今屆最龐大嘅議助團。但由於政府只畀廿萬議員用,使凸的話議員要自己補貼,難怪張國鈞都話:「好似開中小企咁,人多到我要貼錢出糧畀佢哋。」

除此之外,據了解今屆因內訌而遭滅黨嘅新民主同盟,以及部分民主黨前議員嘅議助,心郁郁想集體過檔,加入近排人氣爆燈嘅楊岳橋議助團,聽聞佢哋自我Hard Sell話可以做公民黨嘅地區樁腳,力推公民黨做泛民第一大黨咁話。不過,楊岳橋就話呢班人要先入黨,就唔係佢一個人話晒事。

今屆被指輸得極無體面嘅黃毓民,決定出山做鄭松泰的義務顧問,延續「教主」統治。

 

 

田北俊(左)剛幫完李梓敬抬轎,轉頭出任鍾國斌(右)的義務顧問,認真抵得諗。

 

羅冠聰(右)決定請黃之鋒做議助,兩人未畢業,就齊齊逗政府人工。