為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 10 月 20 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

彤叔,再見了,願你一路好走

人稱「彤叔」鄭裕彤博士嘅離世,令人感到惋惜,同時亦勾起我唔少舊嘅回憶……回想當年我喺大福證劵做嘅時候,與彤叔可以講算幾有緣,今日我喺職場擁有嘅一切,除咗奠基於滙豐銀行同德意志銀行,更可謂成就於大福證劵(海通國際嘅前身)。眾所周知,當年我係大福嘅董事同埋管理層,工作上極其量都係接觸到「純官」(鄭家純先生)居多,從無諗過可以見到彤叔呢位「老總」,不過當時喺同事同行家口中,都略聽過呢位大老闆嘅一啲故仔。

話說九四年我代表大福證劵,喺《東周刊》做咗一次專訪,內容提到大福嘅運作同埋發展路向,當訪問見報後,隨即收到「上層」嘅電話,當其時我心諗,唔通叫我去「照肺」?去到會議廳嘅時候,除咗見到一啲高層外,勢估唔到彤叔都喺席上,自問以前喺滙豐做嘢嘅時候都已經見慣世面,亦都聽過彤叔為人隨和,嗰次第一次見到彤叔,心情點都有啲戰戰兢兢,因為諗着唔通我喺訪問度講錯嘢,彤叔因此要責難我?殊不知整過會面過程,彤叔不單無責怪我,仲問我喺訪問當中有無遇到難題,又教我從另一角度去睇公司同集團嘅發展,以便日後再面對其他訪問時,我可以應付得更加自如,可以答得更完善。嗰次係我生平「第一次」跟彤叔碰面,我真係一啲都無覺得佢係「曲線照肺」,反而覺得佢係真心想塞錢入我袋,彤叔待人接物嘅態度,多少都影響到我日後喺對外公關及管理嘅處事上。

又記得有一次,我喺新世界大廈大堂再碰見彤叔,佢突然問我大福證劵嘅一單DEAL進度如何?真係唔怕失禮講句,我當時係一時忘記咗個單DEAL嘅存在,經彤叔一提,令我不得不佩服佢睇嘢嘅微細,同埋辦事嘅魄力。雖然佢日理萬機,但對集團內大小事務卻瞭如指掌,嗰次係我哋嘅第二次碰面,雖然係發生喺短短唔夠一分鐘嘅寒暄上,令我對彤叔投下更有信心嘅一票,亦令我明白到原來做一間大企業嘅「掌舵人」真係唔容易,要知道成個集團運作嘅項目同細節,先可以日理萬機運籌帷幄。

係人都知彤叔有個花名叫「沙膽彤」,緣起至當年八九民運後人人都怕咗投資內地,加上當時大陸被人標籤係地大、「勿博」,地產難有發圍,彤叔嗰時反而用咗人棄我取嘅策略北上發展,更仲喺當時買咗好多地,不過當然嗰時內地房地產點都要捱過一段長時間先有發圍。講真人棄我取唔係人人都可以做得到,因為要面對群眾壓力去做決定,但今日睇返轉頭,證明彤叔當年做事果斷、眼光獨到,彤叔膽大心細加上重誠信嘅做事作風同思維,亦都啟發咗我喺待人處事上嘅諗法。之後我走出大福自立門戶,出嚟講股票、做電台、做演說,大凡未有人試過或睇唔好嘅新嘗試,我都願意「沙膽」地去試,今日我行出一條唔錯嘅路,都真係要感謝呢位前老闆。

鄭裕彤很多營商及處世之道,都很值得學習,他的離世令人十分惋惜。