為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 10 月 09 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

真.復刻經典

近年香港已經少見動作搞笑戲種,相信唔少好此道嘅影迷都「餓戲」已久,即將上映嘅《辣警霸王花》,就可以一慰影迷之渴。導演錢國偉(Wilson)復刻經典嘅《霸王花》系列,仲精心挑選廿幾個女演員,將佢哋變成動作影星,喺戲中打到飛沙劈石,當中包括女神級人物岑麗香。

今次「Paco巨星飯堂」就邀請Wilson,率領一眾「霸王花」:香香、楊思琦、蔡潔、崔碧珈(Anita)、郭思琳同余曉彤(Hidy),去到位於尖沙咀嘅「Maison Eight」,一邊品嘗特色法國菜,一邊公開佢哋上山下海嘅幕後秘密。

我帶Wilson導演(後左)、郭思琳、思琦、香香、蔡潔、Anita同Hidy(前左至右),去到位於尖沙咀嘅「Maison Eight」,品嘗特色嘅法國菜,細談復刻經典嘅電影《辣警霸王花》,幕後嘅拍攝點滴。

 

Jeana、香香、Anita同欣宜等,拍完每一場戲都認真睇Playback,同Wilson研究一番;後者盛讚欣宜喺鏡頭前後都係開心果,令拍攝氣氛更融洽。

 

女神全召集

Wilson一向多諗頭,動作片復興,佢就復刻八十年代惠英紅、吳君如等主演嘅電影《霸王花》,誓要打造一部以全女班為主嘅搞笑動作片。揀人眼光獨到嘅Wilson,即刻集合二十幾位靚女演特警。為咗將經典upgrade,劇組仲落重本,遠赴馬來西亞實地拍攝兩個月,我曾經去過當地探班,眼見一眾女演員完全唔錫身投入拍攝,專業精神實在可嘉。

而Wilson對佢哋亦都讚不絕口:「同時要照顧二十幾個女演員都幾困難,但同佢哋合作係好開心嘅。班女仔好捱得,動作武打場面都算密集吓,但佢哋全部親身上陣,不時有流血、跌傷、骨折等情況發生;加上外景場地又曬又熱,日日都有三兩個話唔舒服要call白車。

「呢班特警有香香、Jeana等女神,有人問過我:『欣宜咁有份量都入選?』,其實佢飾演車隊嘅機械天才,亦係負責發放笑料,角色好重要;而且佢喺片場都係咁講笑,令到台前幕後嘅工作人員,都可以喺一個開心嘅氣氛下做嘢,盡得佢媽咪嘅真傳。」

意大利新鮮芝士球、番茄配紫蘇醬($178),相當醒胃,係前菜必選項目。

 

酥皮蘇格蘭三文魚配香檳汁($178),外觀似甜點拿破崙蛋糕,已先聲奪人;入口香甜,別具風味。

 

香煎牛仔核及牛仔里肌肉配時令蔬菜、羊肚菌($498),挑選香港少有廚師選用、處理工序繁多嘅牛仔核作食材,極有風格。

 

勇跳入急流

講到電影嘅情節,其實主要係描述一班特警新丁,為廿年前任務失敗嘅霸王花復仇。戲中上一代嘅霸王花,就由鄧麗欣(Stephy)、思琦、Jessica C.同陳嘉桓等飾演,喺泰國泳池邊性感放蛇揭開序幕。

已為人母嘅思琦,喺戲中着上Bra-top現身,佢仲多謝Wilson畀機會自己,同一班後生女同場比併。「估唔到自己做咗媽咪後,仲可以keep到有腹肌。最開心嘅係,我都好快應付到一連串動作戲,其中一場係要喺五樓高嘅地方跌落嚟;又有好多爆破場面,真係要執生。

「至於最難忘嘅就係,同Stephy有一場動作戲,要好講求默契,喺爆炸嘅同時,我又要揸槍逃命,拍嘅時候我仲夾傷手指,嗰一刻手指無晒知覺,我仲以為斷咗添呀!哈哈!」

新一代嘅霸王花中,香香就飾演思琦嘅乖女,為母復仇而加入女特警行列。首度喺大銀幕現身就要處理多個動作場面,香香話拍攝時已經豁晒出去。「以前我演嘅角色,都係被保護、乖乖女嘅,今次就完全唔同,要好硬淨!拍攝之前,我就跟武術指導去爬山、跑步、游水,練好啲體能打底。

「不過,發生意外都好難避免,我試過喺沙灘拍攝時,撞到嚿大石跌倒,搞到要入醫院,好彩照X光之後,知道冇大礙;另外跳入急流嗰場戲我都好難忘,因為當時只係綁住條繩咋!我仲要成日去睇跌打同按摩,最痛苦係肌肉痠痛。導演好好,有次我膝頭瘀晒,佢就畀咗自己罐冰凍可樂我敷膝頭,真係好窩心!」

要應付大量嘅動作場面,香香坦言信晒Wilson,豁出去投入演出。

 

思琦以Bra-top上陣,盡show腹肌,同Stephy拍住上飾演前任「霸王花」。

 

蔡潔(左)係戲中嘅「唯一反派」,但佢同Anita(中)、Hidy(右)一樣,拍到傷痕纍纍都在所不計。

 

 

香香(上圖)同一眾靚女(右圖)親身上陣跳入急流,完全冇錫身!

 

全員大變身

一眾女演員睇起上嚟好似弱不禁風,但處理起動作場面時,全部都變身為動作演員,除咗思琦同香香,其他嘉賓都一樣搏命。蔡潔話:「我算係戲中唯一嘅反派,因為特警隊分A、B隊,香香佢哋一team,我就喺所謂嘅精英team,所以要同佢哋對抗,亦要參與好多動作戲。雖然每次收工都好攰,但係就拍得好開心。」

Anita就表示:「我平時都有做開運動,但拍呢部戲所付出嘅體力同汗水,完全係另一件事。有場戲講我哋training,要喺泥地上面爬行前進,背脊上面係鐵絲網,拍一個take就已經好攰,加上天氣又熱,都幾辛苦o架。」

至於曾經參與《G-1格鬥會》嘅思琳,仲有即將投身MMA行列嘅Hidy,就異口同聲話:「雖然拍動作戲會比較辛苦,但係出嚟嘅效果好,點辛苦都值得嘅!」

香煎吞拿魚配小生菜、芥苿醬($188),不論口感同味覺都有豐富嘅層次,值得一試。

 

蒸金頭鯛、鵝肝、野菌配黑松露汁($368)嘅賣相特別,係一道色香味俱全嘅特色菜。

 

燒新西蘭羊肉眼配時令蔬菜($418),羊肉燒得嫩滑。

 

開心果蛋糕配朱古力醬、草莓($98),蛋糕甚有質感,同朱古力醬夾得啱啱好。

 

伊頓甜品——蛋白、奶油、山莓($98),伊頓甜品(Eton Mess)係傳統嘅英式甜品,軟滑嘅蛋白霜加忌廉配上山莓,酸甜味道配合得宜。

 

Maison Eight

地址:尖沙咀天文臺道8號21樓

電話:23888160