為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 10 月 06 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

爛佬與潑婦

相信全世界沒有一個國家嘅選舉,會及得上美國總統如此受人注意,更何況今次係由民主黨嘅希拉莉,對共和黨嘅特朗普,當然受注意嘅原因,並唔係因為佢哋兩個有非常高嘅政治魅力,而係因為兩人參選至今,都有過大大小小不同嘅負面消息出現,相信不少美國人或者會覺得,如果有第三個人參選,絕對唔會揀希拉莉又或者特朗普。金融界亦認為,無論希拉莉或特朗普當選美國總統,對美國而言同樣可能係災難,因此有人笑言今次美國選舉,係「爛佬與潑婦」之爭。

不過,既然o依家只可以係爛佬與潑婦之間揀一個,咁應該投爛佬,定係潑婦?相信正路一定係希拉莉,因為單係睇CV,佢丈夫係前美國總統克林頓,佢自己又曾做過國務卿,政治經驗遠比一直從商嘅特朗普豐富,毫無懸念應該係大熱勝出,但點解最新民意調查會由大幅度領先,到o依家只係與特朗普打成平手?

先唔理對手如何出奇制勝,單係健康問題,已經令唔少人驚佢可唔可以處理到總統事務,萬一做到中途因為頭暈身㷫,又或者腰痛腳痛被迫中途離場,絕對係美國總統使上一大笑話,亦非美國選民希望見到嘅事情。當然,仲有電郵風波上令希拉莉失咗唔少分,所以民意顯示,希拉莉嘅支持度與特朗普嘅距離收窄到近乎零,佢自己其實要負上唔少責任。

當然,爛佬特朗普出奇招,亦係一個好大原因令佢嘅支持度,同希拉莉相近,而特朗普嘅奇招簡單而言就係「人做我唔做」,當全世界講道德嘅時候,佢唔講;當全世界講道義嘅時候,佢覺得係廢話,正因為佢標奇立異,所以唔少受壓迫嘅美國選民反而Buy特朗普,因為唔少人反而覺得,與其選希拉莉繼續現有局面,點解唔選一個唔知佢會點,但可以肯定有改變嘅特朗普?係賭博又如何,因為人生就係賭博。

至於邊一邊會贏,o依家言之尚早,當然如果根據歷史從正路分析,相信大部分人都希望希拉莉最後可以勝出,至少金融界一定係咁諗,因為會少咗啲不明朗嘅因素,但係今年全球咁多選舉,有邊一次正路諗會係啱,英國脫歐公投係咁,香港立法會選舉亦係咁,當然大家可以將呢啲結果,歸納為民粹主義抬頭,更大可能係全球貧富不均問題正在不斷湧現,而且愈嚟愈嚴重嘅後遺症,以致選舉結果亦愈嚟愈難預計。

所以,我唔會排除爛佬有機會贏,更何況就算潑婦勝出,對香港或中國亦唔見得係一件好事,大家唔好唔記得希拉莉出任國務卿期間曾提出將美國嘅戰略部署重返亞太地區,所以才有今日嘅南海等問題出現,由此可見,無論爛佬定係潑婦勝出成為下任美國總統,對中國而言都未必係一好消息。

今次美國大選希拉莉與特朗普之爭,兩人都有不少缺點,哪一位勝出對中國都不是好消息。