為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2016 年 10 月 02 日

最溫柔的男人 徐榮

徐榮其實很有型,梳個all back頭,留一臉欷歔的鬍鬚,chok一個不羈浪子樣,甚至有點竹野內豐feel,也極符合《巨輪2》中,黑幫老大馬文泰應有的氣勢。

 

從跑龍套到成為男配角、主角,入行十六年,同屆藝訓班的楊怡和林峯,早就上了枝頭變鳳凰,展翅翱翔飛出去了,只有徐榮還在。

還幸也算是大器晚成吧?「我覺得我所有嘢都嚟得好遲,但嚟得早其實未必係好事,可能一鋪撻死咗,慢慢磨利把刀,o依家畀咩角色我都有信心可以做到。」徐榮聳一聳肩說。

相對於好型的徐榮,其實他更是極度《愛‧回家》,好老公、好爸爸的印象實在太深入人心,以至連演黑社會大佬,都被網民笑評:「見到佢個惡樣就想笑,太慈祥,淨係會諗起佢抱住個女!」是的,徐榮女兒包包(徐心怡),甚至可能出名過爸爸。

「係就好呀!我想佢搵錢多過我,開心死啦!」更笑言絕不介意被指父憑女貴。

甚麼男人最溫柔?他的名字,是父親。

 

輸在起跑線

徐榮的名字,其實是近年才為人所識,與他同期九九年入訓練班的,楊怡、林峯和楊明等早已成名。「我廿四歲才入訓練班,比他們大五、六年,其實早就輸在起跑線。中五畢業之後一直做運輸,但九七年公司執笠,廿二歲,老闆話之後想搞餐廳,叫我哋幾個夥計去學廚,咁咪去學囉,點知學咗一年佢都冇開,嘥咗一年喺廚房。之後諗住考懲教署打政府工,但報完名到interview要等八個月,中間卡住個藝訓班招生,咪去試下囉,諗住玩吓,點知咁就入咗行,懲教都冇去見啦。」

面對一班上位快過火箭的同學,做極都是路人甲、乙、丙的徐榮,坦言曾經眼紅過他們。「見到楊怡同阿峯佢哋咁成功,自己開始會比較,但我明機會唔係人人都有,況且佢哋其實都有捱過,楊怡同我曾飾演一對浸豬籠嘅奸夫淫婦,浸咗落水,佢哋就放食飯個個走晒,我哋兩個喺豬籠入面你眼望我眼,大家互相打氣話『頂住呀!』、『頂住呀!』,諗番起都幾過癮。」

過癮還過癮,始終跑龍套搵極有限,他每個月只能靠着微薄的收入,甚至借錢度日,經常連日常自理都有問題。「最窮試過銀行張卡得番八十蚊,撳唔到錢,唯有打畀朋友問有冇廿蚊過住嚟,幾乎成日都係咁,尤其月尾最手緊。直到有次拍完《酒是故鄉醇》,一撳錢望到,竟然出『爆騷錢』二萬九,我當時在櫃員機數數字,直頭唔敢相信,跟住即刻撳咗兩百蚊出嚟食嘢。」

為生活,他也曾到處做兼職,開電單車做速遞、代客泊車等。「最緊要搵到餐飯食!」面對生活的壓力,說沒有想過放棄也是假,徐榮回憶說,曾經有位前輩這樣說:「只要一日唔退出呢個圈,梗會有機會!」

捱足八年,終於等到機會。

《同事三分親》中的裘俊一角,開啟了他的處境劇之路,從《同事三分親》、《畢打自己人》、《天天天晴》到《愛‧回家》都見到他的身影,成了處境劇的鐵膽。

「裘俊對於我嚟講,無疑係我事業嘅轉捩點,當時本來角色唔重,只係office入面嘅一個擦鞋仔,但多得關詠荷,拍到中段佢突然話想生多個B,跟住就辭演咗!但係套劇點都要有個主線繼續行,上面開完會覺得我同欣欣(江欣燕)條線都幾好睇,於是決定畀次機會我哋。」

徐榮(後排中)九九年加入藝訓班入行,同期的同學中楊怡和楊明年紀輕輕就成名,他卻一直捱了八、九年,才算是守得雲開。

 

《同事三分親》的裘俊,讓徐榮的事業得見曙光,之後又參演了《畢打自己人》等多套處境劇,收入亦因而漸漸穩定下來。

 

手抱女兒一同拍劇,徐榮可說是香港近十年電視史上,第一對熒幕父女。

 

《巨輪2》中飾演黑幫大佬,可惜好爸爸形象實在太明確,兇人都冇人驚。

 

女兒包包可愛度爆燈,人氣超高,網上受歡迎程度甚至比徐榮更勁。