為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 09 月 29 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

年輕人要成功先訓練毅力

陸叔開Chat自開欄以來,訪問過唔同階層人士既成功經驗,佢哋都有一個共通點,就係敢想、敢做、同埋有堅定既毅力。不過,曾經有幾個年輕人不約而同咁同我講過,今時今日社會上嘅機會已經買少見少,更何況近年社會對八十後、九十後都有負面標籤同埋定型,就算幾努力都好,已經無我哋呢啲前輩咁易成功同埋上位了。

自問響職場打滾咗超過了四十個寒暑,見證過香港唔同嘅發展階段,其實每一個年代都有佢嘅「遊戲規則」,我同意今時今日要成功的確係難過以前,但唔係代表無機會。坦白講,甚麼八十後、九十後並唔係一個硬性嘅標籤,我記得當年出來做嘢,當其時我哋啲五十後,都係俾三十後同四十後批評,所以這個代溝嘅問題,咩年代都會存在,年輕人們亦不用太過上心。

提到「遊戲規則」,我哋出道嘅年代,無可否認係學識(IQ)先行,始終當時香港有大量勞動人口,大學畢業無疑係鶴立雞群,但時移世易,現在年代已唔係單講IQ,仲要論EQ、AQ等等。我個人認為年輕一代嘅IQ絕對無問題,始終他們父母都有經濟能力,供書教學樣樣齊晒,可謂學識豐富。不過,正因為大部分人都響溫室環境中長大,太易得到想要嘅嘢,反而無咗一種追求目標嘅動力同埋熱情,而且,遇到一啲唔如意事情時,亦會較容易放棄。

我到呢一刻,仍然記得當年響滙控工作時,響瓦努阿圖流放式嘅鍛煉生活,或者係當年嘅外展訓練,雖然係好辛苦,但卻磨練出驚人嘅意志力,雖然呢啲經驗當其時唔係即刻變錢,但卻在職場上終身受用,亦幫我捱過唔少難關。坦白講,o依家都市人生活水平提高咗,唔會有幾多人好似我哋以前咁去接受呢啲磨練,有時間都上吓網,但我認為如果有時間,大家可以搵一啲挑戰俾自己,去磨練毅力同意志。

事實上,知識真係唔難學,好似我雖然讀化學出身,但當投入了銀行同證劵行做嘢後,就自自然然學識職場上嘅技能,尤其o依家係資訊同網絡發達嘅年代,上網打幾隻字就可以學到好多新知舊事。但係毅力同意志力,就真係要靠自己日積月累嘅經驗才可以成就出來,亦都係成功嘅重要種子。

無可否認,近年社會上多了好多年輕人以較激進手法表達意見,同埋爭取自己想要嘅嘢,當中亦有人好快以此上位,問題係我始終認為呢啲係好個別嘅例子,唔係一種 「王道」嘅成功方法。「萬丈高樓從地起」係千載不變嘅定律,而唔知大家有無留意,我之前訪問嘅嘉賓唔理佢做咩行業,有今時今日嘅成就,都係要花時間一步一步行出來,無人可以走出呢一個「王道」嘅框框。

陸叔以在職場打滾四十年的經驗,經常勉勵年輕人,認為成功要一步一步行出來。