為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 10 月 02 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

超閃耀樂章

本地樂壇,我哋身為本地人,梗係要大力支持!本地女團Super Girls,嚟緊喺十一月就會舉行首個大型演唱會《Shine On Live 2016》,閃耀九龍灣Star Hall。所以我就誠邀五位成員:隊長Aka(趙慧珊)、Cheronna(吳嘉熙)、Heidi(李靜儀)、Jessica(蔡明思)同Yanny(陳穎欣),擔任今次「Paco巨星飯堂」嘅嘉賓。

我帶五位嘉賓去到位於銅鑼灣嘅「海都酒家」,品嘗全港獨有嘅香檳盛宴,率先為佢哋慶祝開show之喜!

我帶即將開Show嘅Super Girls:Cheronna、Jessica、Aka、Heidi及Yanny(左至右),去到位於銅鑼灣嘅「海都酒家」,品嘗全港獨有嘅「海都香檳佳餚盛宴」,暢談佢哋為演唱會準備嘅過程。

 

有深層主題

Super Girls今次演唱會叫《Shine On》,據Cheronna表示,Shine呢個字仲有更深嘅意思。「S.H.I.N.E.五個字母,都代表我哋嘅其中一種特質,包括Seduction(誘惑)、Happiness(喜樂)、Innocence(純真)、Nostalgia(念舊)同Elegance(典雅)。因為我哋每個人畀外界嘅印象都唔同,所以今次係一個好嘅機會,等我哋show更多唔同嘅一面畀fans睇。」

隊長Aka大表同意,佢仲補充話:「喺Seduction嗰部份,我哋都會show最性感嘅一面,所以開會嘅時候,我就同stylist夾好,話咗今次會冇底線,總之出嚟嘅感覺行先,只要係靚嘅我哋就100%配合!」

Jessica繼續話題:「雖然我哋喺一五年已經舉行過《Flash On》音樂會,但係今次嘅規模更加大,所以我哋每方面都畀夠120%去做!」

Super Girls已積極為十一月舉行嘅《Shine On Live 2016》演唱會籌備,到時要以最佳狀態會粉絲。

今次試食嘅係「海都香檳佳餚盛宴」,除甜品外,每道菜式都配上Moët & Chandon Champagne,每位收費$880(六位起及需三天前預訂)。前菜之一係芝麻凍豆腐及欖角茸炒帶子,相當醒胃。

另一道前菜係脆皮燒腩仔及川椒雞丁,兩者味道較濃,配上帶少許白胡椒辛香嘅粉紅香檳,令人回味。

鵝肝醬片皮雞,炸子雞做法炮製嘅脆雞皮及麵包,中間以鵝肝醬作「饀料」,層次豐富。

 

展現新面貌

一直被視為隊中嘅純真代表Yanny,就話要嚟一個突破。「呢個形象只係好表面化嘅啫,其實除咗image,我哋喺揀歌方面都會配合番唔同嘅主題,當中包括一啲我哋好鍾意嘅歌,因為數量太多,我哋仲篩選緊,暫時必唱嘅,就係Joey(容祖兒)嘅歌。」

Heidi就表示:「o依家我哋每日都要練歌同練舞,keep住個狀態之外,因為好多舊歌都會重新編過舞,所以我哋要熟習新嘅舞步,到開show嘅時候,啲fans先會有驚喜。」

Super Girls早前喺九州工作八日,寓工作於娛樂,睇Jessica(左)同Yanny嘅姿態,就知佢哋當時有幾high!

Aka(左)同Cheronna(右)就話將會演繹別人的歌,大show唱功。

 

蒜片和牛粒拌脆皮牛腩片,配上1999年嘅珍藏香檳,更能突出牛肉嘅香味。

 

上湯焗龍蝦球,龍蝦肉質鮮嫩彈牙,經上湯焗製後,味道更鮮甜。

難忘九州牛

喺積極投入開show嘅準備工作之時,Super Girls仲keep住曝光率,參與拍攝TVB嘅旅遊節目,啱啱完成咗八日嘅九州旅程。佢哋都興奮地表示,呢趟行程係寓工作於娛樂。Yanny同Cheronna異口同聲大讚當地嘅和牛:「喺我哋試過唔同嘅和牛烹調方法入面,今次喺九州試到一個加咗溫泉蛋同wasabi嘅,係當中最有特色嘅方法。溫泉蛋提升咗牛肉嘅質感,wasabi就凸顯咗牛嘅肉香,一講就想再去食過!」

Jessica就話:「因為我哋喺香港係唔可以食雪糕嘅,所以一去到當地一條雪糕街,我哋都好興奮,係咁食!而九州嘅梅子係好出名嘅,就連梅子雪糕都係好清香鮮甜。」

Aka同Heidi就難忘乘坐甜品列車。「我哋仲喺車上面扮《屍殺列車》啲喪屍,哈哈!仲玩到畀人趕。」

輕鬆過後,佢哋就要日以繼夜練歌練舞,我就預祝佢哋good show!

Jessica、Heidi同Yanny(左至右)表示會喺演唱會中展示鮮見一面,志在帶出新鮮感。

喺剛結束嘅九州之旅,Cheronna(前)、Aka、Yanny同Jessica(後左至右)喺甜品列車上,表現興奮。

黑松露焗龍躉扒,魚扒外脆內鮮嫩。

甜品係金絲脆麻花伴蜂蜜黑糖糕,脆麻花香脆可口,配上煙靱嘅黑糖糕,各具特色。

Yanny同Cheronna都向我推介呢個九州嘅溫泉蛋和牛,睇相就已經感受到佢哋品嘗時嘅滿足!

海都酒家
地址:銅鑼灣禮頓道8號香港銅鑼灣皇冠假日酒店2樓
電話:29722813