為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2016 年 09 月 24 日

緋聞女友忙拍劇 伍允龍搵仔陪

早前,無線熱播劇《城寨英雄》創收視新高,帶挈埋劇中主角大受歡迎,其中拍電影響朵的功夫小子伍允龍Philip,首次跳入視圈,即憑「貓仔、龍成虎」一角升呢男神兼成功入屋,更與劇中女友「柯德莉」(劉佩玥飾)傳出緋聞,雖然二人矢口否認,但出席活動時經常眉來眼去、攬頭攪頸,是否戀人只有他們才知。

入行鮮有緋聞的乖仔伍允龍,早排同劉佩玥傳出戲假情真。

日前,記者就發現Philip偕男友人去尖沙咀shopping,黑衫牛仔褲波鞋的大隻仔,專睇運動衫褲,閒逛十五分鐘,即有收穫。其間有女fans興奮搵「貓仔」集郵,他態度友善冧到班fans們好開心。之後男神排隊畀錢,手瓜起的他一邊把玩斜孭袋、一邊睇電視播放的足球片段,睇到入晒神。最後碌卡找數,男神與友人去附近食飯醫肚,再獨自返家。緋聞女友忙住拍劇,Philip就只得揾男性朋友陪shopping,真係乖仔! 

對於與緋聞女友劉佩玥的關係,小記再問Philip,他就依然說:「好多謝大家投入『柯德莉』和『龍成虎』的關係,證明我哋演技和套劇非常成功。但其實我哋真真正正只係朋友。之前宣傳、訪問,我哋因為太投入而玩得顛又放,呢種關係我已經好開心,好滿足。我係單身,感情事等神安排啦!現階段只專心努力工作。」

 

 

伍允龍man爆出巡,手瓜粗過大髀加埋個酒窩,冧死女。

 

日前,伍允龍帶徒弟齊齊出席多倫多影展,睇完首映又做訪問,躋身國際。

 

伍允龍曾與緋聞女友劉佩玥經常同對方的閨蜜好友出街,似是已經融入對方的生活。