為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2016 年 09 月 25 日

原點 葉童

這天葉童到來時,化妝和髮型已整理好,隨行的只有一名為她拿取拍攝衣服的女助手。要做訪問了嗎?她爽快地便坐下來,點了杯咖啡,哈哈哈哈的跟我無所不談;要拍照了嗎?她又會詢問攝影師的意見,揀選適合的服飾來配合……那種親切和爽手程度,令我有點詫異,畢竟她入行三十四年,早已是影后級人馬,按我過往的人訪經驗,她絕對夠晒資格意見多多擺阿姐款有餘。

「其實我有段時間都以為自己好巴閉、好叻,但耐咗我就諗番起,出道嗰陣,我只係想將演員最基本同最專業嘅一面,呈現出嚟畀大家睇咋嘛,如果今日嘅我,叫做有小小嘅成就,都係大家畀機會我同錫我,咁我應該要更加謙虛同珍惜囉!

「做人,莫、忘、初、衷,真係好緊要!」

是真的,能夠保持着最初那份單純的心態去面對一切,看似容易,其實很難,猶幸葉童記性好。

 

腳震震

十月底,葉童將會夥拍陳志雲,合演舞台劇《莎士 比亞》。她說,縱使自己演戲數十年,但單是聽到「莎士比亞」四個字,個心已經離一離。「呢啲大文豪簡直要當佢係神咁拜o架喎!係咪先?而且我仲要第一次拍大師(陳志雲),我喺套劇裏面,又唔止演一個角色,啲台詞又好忠於原著、好文學,咁新嘅嘗試,對我嚟講,係好好玩o架,但真係有啲壓力囉!哈哈哈!」

其實葉童過往曾演過不少舞台劇,其中九二年首次踏上大會堂舞台演出的《孽戀焚情》,她印象最深刻。「呢套係我第一次演嘅舞台劇,我第一次着長衫,長衫側邊有衩,我一坐低,成對腳就唧晒出嚟,好彩導演個太太係上海人,佢就教我將件長衫嘅邊攝入腳度,咁樣就唔會走光又好優雅。

「嗰陣我本來以為自己咁有演戲經驗,應該唔會驚。點知我一出場,坐咗喺度,隻腳就不期然冇停過咁震震震震,哈哈哈!我嘅潛意識話畀我知:嚟緊呢兩個鐘頭冇人幫到我,好醜都係睇我台戲!呢個反應就係話我知,我當時真係好驚、好緊張!哈哈哈!

「身體嘅反應係唔會呃人,相隔咗廿四年,呢個感受我仍然好記得!所以呢齣《莎士对比亞》呢,我都未知到時會唔會震o架!哈哈!」

為了《莎士比亞》的舞台劇演出,葉童近日閱讀了不少莎士比亞的資料和作品。「套劇有現代同古代,我o依家都調整緊對白嘅語氣。」

 

首次跟陳志雲合作,她說:「大師係個好斯文、好勤力嘅人,佢朗誦同文學都好叻,對莎士比亞好有認識,我覺得佢哋搵啱咗人選!」

 

好孤獨

對《莎》劇充滿期待,另一個原因是因為演出場地在新光戲院。「我得幾歲嗰陣,就係住喺新光隔籬嘅書局街,所以呢個地方可以話陪住我長大,對嗰一帶都好有感情。」

葉童原名叫李思思,出身小康之家,父親從事出入口生意,對上有一個姐姐。「其實我另外仲有個阿哥(李中寧),但佢唔同媽咪,完全冇接觸。我家姐呢,因為年紀大我好多,所以我細個都係自己同自己玩。」

孤獨,是童年給予她最大的感受。「我細個,爹哋唔係同我哋住,屋企人要出去搵食,所以我係自己一個返學、放學,買嘢食返屋企食,食完就開電視睇:因為唔畀出街,我嗰陣冇朋友,全日就係咁自己一個喺屋企,到差唔多時間,我就會喺門口裝吓架(車立)有冇到我哋呢層……諗番起其實都幾慘、幾孤獨,但某程度上,咁樣係令我個人成熟啲,睇嘅嘢唔一樣。」

直至十四、五歲,因為雜誌一則模特兒公司招生廣告,改變了她的命運。「嗰陣我睇《姊妹》同《婦女與家庭》啲時裝相,見到啲model可以着靚衫,又可以郊遊、食雪糕、去沙灘玩,好開心,我幾嚮往佢哋嗰種生活;有次見到有模特兒公司招生,我就諗:『係咪只要我讀呢啲班,就有機會影啲咁開心嘅相呢?』咁我就去咗報名。」

 

 

八十年代中,與鍾楚紅(右)為新片圍讀,當時的葉童(左)才不過十九歲。

 

八二年跟張國榮合演的首齣電影《烈火青春》,雖然片中有不少激情場面,但因為對幕後班底有信心,她演出時毫無包袱。