阮小儀剩女生活

阮小儀嘅感情生活一直備受關注，皆因佢年紀唔細仲未有拖拍，所以早排網上散播流言，話佢同余文樂撻着，就迅即震驚網民，仲上埋報紙嘅娛樂版添！

雖然，小儀畀人封做「黄金剩女」，但係佢嘅剩女生活都可以好豐盛、好自在。譬如：東姑早排喺又一城撞到佢，一個人行商場邊行邊「低頭族」玩住個電話，然後去咗間化妝護膚品公司shopping，見佢眉精眼企咁研究啲貨品，同埋格價，絕對係個唔好呃嘅女人仔。

之後，佢約埋個女仔friend去咗餐廳歎茶，邊食邊傾到雞啄唔斷，走人時一路行都仲口水花猛噴，人哋話「三個女人一個墟」，小儀一個女人都抵到三個女人咁多嘢講，呢個剩女又點會話悶呢？

小儀一個人去商場行街，邊行邊做「低頭族」玩電話，好似忙住捉精靈咁款。

小儀喺化妝護膚品店，逐一細心研究啲貨品嘅功效同價錢，係一個相當精明嘅消費者。

小儀同朋友出咗餐廳，都仲係邊行邊講唔停，吹水功認真一流。