林青霞睡衣LOOK出巡

現年六十一歲嘅林青霞，近年養尊處優，已經好少出嚟同大家見面；不過，早排嘅下午四點幾，竟然畀東姑喺中環野生捕獲到呢位大美人，佢身邊除咗一個朋友，仲有一個大隻保鑣，搞到東姑都唔敢行近佢半步。

呢日，大美人以cute爆嘅睡衣look打扮出巡，東姑再睇真啲，原來佢着嗰對鞋同老友一樣係黑色毛毛涼鞋，認真係好姊妹。雖然大美人經常孖住劉嘉玲去行山，但着鬆身衫嘅佢，依然隱約咁見到佢有個小肚腩，睇嚟要再做多啲運動先得嘞。期間，大美人口乾飲水，東姑覺得此時此刻嘅佢，似足一個大BB喺度飲奶，好可愛呀！

飲完水之後，大美人就做低頭族，眉頭緊皺狂玩電話，而佢身邊嘅朋友同保鑣就你眼望我眼，表現非常無奈。最後，大美人同朋友由保鑣護送上咗一幢商業大廈，喺裏面逗留咗大約兩個鐘，然後坐住一架四百萬嘅Bentley Flying Spur新車，絕塵而去。

呢個年代，全世界都做低頭族，一身睡衣look嘅大美人林青霞，都冇法子例外，被手機嘅世界迷倒，難以抽離。

大美人飲水時都甚有儀態，吸引咗不少途人向佢行注目禮。

近期，大美人似乎發福咗，搞到小肚腩凸現，係時候增加運動量「纖」走啲肥肉嘞。

大美人真係好鬼可愛，同朋友玩姊妹涼鞋，喺中環人來人往嘅街道，真係好矚目。

平時，大美人（中）都好勤力o架，孖住老友劉嘉玲（左）去行山keep fit。