為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2016 年 09 月 21 日

律政司促判監 雙學三子恐或雙失

「雙學三子」香港眾志秘書長黃之鋒、學聯前秘書長周永康,以及剛當選立法會議員嘅羅冠聰,因為前年九月帶頭煽動群眾衝入公民廣場掀起佔領運動序幕,早前分別被法庭裁定參與非法集會、煽惑他人參與非法集會罪成,除咗周永康判監三星期、緩刑一年,其餘兩人被判社會服務令。

律政司喺裁決當日即提出覆核,因為認為原審裁判官判刑過輕,加上「三子」感化同社會服務令報告顯示,佢哋並無真誠悔意,律政司認為應該改判即時監禁,以起阻嚇性刑罰,案件排期本周三開庭審理。

律政司呢一次出招,令「三子」陣腳大亂,影響最大當然係下個月就宣誓做立法會議員嘅羅冠聰,呢幾日見佢心情凝重,唔少網民在facebook專頁慰問,佢都無乜心機回答,淨係答:「我也不便多言,感謝各位關心。」咁又難怪,事關根據《基本法》,如果佢被改判即時入獄超過一個月,下場就分分鐘好似當年金融服務界議員詹培忠咁,因三分二嘅議員投票通過,而被禠奪議員身份,到時想做史上最年輕議員夢碎,輸了官司兼輸議席。

左起黃之鋒、羅冠聰及周永康上月原審避過牢獄之災,但律政司可能上訴到底,呢鋪佢哋有排閉翳。

羅冠聰無晒心機,喺fb表示唔想多講。

 

周永康喺fb呻簽證受阻,升學計劃唔知幾時落實到。

另外,打算去英國倫敦政治經濟學院,讀城市設計及社會科學碩士嘅周永康都好閉翳,佢上月搞英國簽證諗住十日內出到,所以一早買定機票,點知簽證搞了成個月都未有。據了解,佢曾聯絡英國領事館了解,對方稱會立案跟進。翻查資料,英國簽證嘅審理時間因應不同因素有所延遲,包括當事人有無刑事案件被定罪等記錄。

經傳媒報道後,其簽證上周五終於獲批,但佢因為要上庭聽判決,惟有改機票時間,乖乖等埋本周三的判決,若果被判即時入獄,佢讀碩士嘅大計亦受影響。

最後一位被告黃之鋒無乜要職或要事,包袱唔大,亦都無乜人關心佢官司後果,所以連日來只能夠在fb轉載事件,呃下like。

律師湯家驊認為,好難預測政府勝算有幾大,但即使覆核唔成功,律政司亦好大機會在十四日內再提上訴,到時「三子」的前途大計有排都落實唔到。

羅冠聰想做最年輕議員嘅夢,可能因官司幻滅。