為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 09 月 24 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

良心樂作業

要數香港有heart嘅音樂人,恭碩良(Jun)一定榜上有名,嚟緊阿Jun就會喺十月舉行演唱會《Just a Concert 2016》,大show佢嘅才華,我相信佢嘅知音都會悉數捧場。

今次「Paco巨星飯堂」,我就邀請阿Jun擔任嘉賓,喺佢開show之前,帶佢去到位於蘭桂坊嘅「Kyoto Joe」,以日式fusion美食,慶祝佢開show之喜。

我帶阿Jun去到位於蘭桂坊嘅「Kyoto Joe」,以日本fusion菜式,慶祝佢即將舉行個人演唱會。

 

廿五年一遇

阿Jun上一次開show,已經係去年嘅《Alive On Stage》,今次嘅《Just a Concert 2016》,就由麥花臣場館移師到灣仔伊館,我覺得伊館嘅規模同音響設備,係最適合佢呢類型嘅歌手開show嘅,咁樣同樂迷嘅交流,同展示自己嘅實力,都係最佳嘅選擇。

「我都好鍾意伊館呢個場,個場對我都係有特別意義,我十四歲嘅時候第一次開show,幫夏韶聲打鼓就係喺伊館,所以今次係我重溫廿五年前嘅show time。

「而且伊館嘅所在地,附近有好多好嘢食,不論係去睇show嘅定係我自己,完show後去食好嘢都好方便,唔使好似去機場或者其他場咁,咁唔方便。」

事隔廿五年,阿Jun再踏伊館舞台,佢表示會施展渾身解數,晒冷演唱。

 

京都沙律($195)選用有機蔬菜及新鮮刺身作材料,配上特製醬汁,甚為開胃。

扒大蝦海苔卷($185),以燒蝦代替普遍使用嘅炸蝦製作卷物,更能保留蝦肉鮮味。

海鱸卷($195)係香港少見選用鱸魚製作嘅卷物,魚肉鮮嫩多汁,值得推介。

 

精挑心水作

哈哈哈!阿Juno依家正在用心挑選演唱歌曲之際,仍然有呢個想法,實在相當體貼。講到選曲同環節編排,佢就話:「可以嘅話,我會唱晒我自己嘅歌,包括我幫其他歌手寫嘅歌,但係有啲歌嘅key未必啱我唱,好似我幫陳柏宇寫嘅,佢個key咁高,如果我要唱嘅話就要重新arrange過,所以我喺呢方面仲考慮緊。」

阿Jun從小就打鼓,我就覺得一定要有一part畀佢大顯身手!「本來我仲諗緊加唔加呢part,既然Paco你request,我會安排吓!其實今次幫我打鼓嘅Piaget,都係好『行』嘅,咁觀眾先會投入。今次嘅show會走casual路線,我想嚟睇嘅人都可以relax吓,o依家社會太多負能量,我想佢哋喺睇show嗰兩個幾鐘入面,可以叉吓電。」

自小已經同鼓結下不解之緣(下圖),我提議阿Jun要喺演唱會中加插打鼓環節,以慰樂迷嘅期待。

 

Buta Yaki 黑豚肉($60)先以炆煮方式處理黑豚肉,再以爐火燒煮,令豚肉毫無膩感,亦相當滑溜。

綠天使他他($220)嘅底層以紫菜及飯粒製作,配合上層嘅蔬菜,層次豐富。

 

難抗拒咖喱

既然阿Jun咁落力籌備,相信佢喺飲食上都會配合,以最佳狀態示人。「o依家我會盡量少食辣嘢,但係我個人係無辣不歡嘅,所以難度都幾高。尤其係面對咖喱,我係零免疫力嘅!不過,以我咁多年食咖喱嘅經驗,我會揀嚟食嘅,因為quota有限吖嘛。

「我鍾意食嘅咖喱係帶葡國特色嘅,因為我係澳門人嘅關係,細細個就食婆婆煮嘅咖喱,佢係落好多洋葱同菜,所以味道會帶多啲甜味;另外非洲雞嘅辣味,我都係好鍾意。如果喺街食咖喱嘅話,我就會先試食薯仔先,如果質感唔啱或者唔夠入味,我幾鍾意食都唔會畀機會佢。」

阿Jun對音樂嘅品味,比佢對咖喱嘅更加講究,所以我對佢嘅演唱會,信心十足!

阿Jun正積極籌備演唱會,佢嘅好友如方大同等,就已答應擔任嘉賓。

唱作以外,阿Jun亦有涉足影壇,一展佢對演戲嘅天份。圖為佢喺電影《紀念日》之演出。

龍蝦汁鱸魚($220)係集兩大海鮮之味於一身嘅菜式,鮮甜味美。

是拉差輕燒薄牛肉($230),「是拉差」(Sriracha)為帶甜味嘅辣醬,同牛肉嘅味道非常夾。

 

椰菜花天婦羅($80)係餐廳嘅特色素菜之一,以酸辣醬汁帶出椰菜花嘅甜味,極具特色。

Kyoto Joe
地址:中環蘭桂坊1號2樓
電話:28046800