為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 09 月 23 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

彭少衍︰兒童中醫院前途無限

衍生(6893)一直主打代理生意,但市場快速改變,創辦人彭少衍亦積極帶領公司轉型。中國中醫文化源遠流長,彭少衍看準兒童中醫市場,希望未來在中國、香港、澳門及新加坡開設兒童中醫院,助小朋友固本培元。今期陸叔將再與彭少衍暢談衍生未來發展大計。

做兒童中醫院,衍生可說是國內唯一, 彭少衍(中)希望第一間在明年首季落成後,就可以複製到全國。

陸:上回講到你哋創立自己品牌後就開始做藥啦,點解會揀兒童藥品呢?

彭︰我哋一開始做冬蟲夏草、靈芝孢籽之類,十二粒裝俾人試,但呢啲保健產品,唔會咁快見效,加上成人產品比較多,市場競爭大,○六年發現再係咁落去成日蝕,開始諗有冇咩方法可以起死回生。我哋做咗啲調研,發現呢啲產品一定要走偏路,最後揀咗兒童品牌,中國行一孩政策,總有一日會開放。

陸:咁多兒童藥品,最後點解會揀開奶茶?

彭:當時我哋調查發現,大人都係關心小朋友兩件事,唔食飯同唔瞓。坊間流傳,小朋友唔食嘢,就去藥坊開啲開奶茶或者七星茶煲來飲,但成日煲好煩。當時我哋喺台灣發現人哋用顆粒,我哋就諗不如做顆粒啦。針對呢幾樣嘢,就研發咗開奶茶同七星茶,呢兩個產品推出來就用個新推廣方式,用公主少爺做廣告,包裝西化,結果好受歡迎,一下子打開咗市場。

陸︰幾時諗住將公司上市呢?

彭︰過程上我都無諗過要上市,初初都係想勤勤力力做好佢,一路發展上個天都好幫我,幾次轉型都成功。至於點解會上市呢?就係因為想做藥廠,要攞地發展,擔心資金上唔夠,有個朋友介紹話可以喺市場融資!

陸︰上市前後個分別有幾大呢?

彭︰上市後令知名度提高,漸漸受到市場認同。上市資金主要用來擴展,例如擴展國內業務,o依家仲係投資期,開始慢慢見到有回報。第二次融資就係引入豐盛控股,希望完成我哋第二個夢想,就係想專注兒童中醫中藥,我哋希望三年間發展成一個連鎖,包括喺中國、新加坡、香港同澳門都會開,香港同新加坡會有一兩間體驗館。其實o依家中醫同中藥喺市場普遍化,你傷風感冒,會想去中醫執藥,預防勝於治療。

陸︰你哋未來宣傳策略係點嘅呢?

彭︰以前係用廣告去宣傳,但o依家廣告好難做,而互聯網同電視台喺中國實在太多,基本上每個地方都有一個台,究竟投邊個台好呢?我發現最好係投放喺醫院,你來醫院,醫生同你介紹,例如腸胃唔好,醫生可以同你介紹衍生開奶茶,一日應該飲幾多,咁就唔使次次都睇醫生。未來推廣就係喺醫院同健康館,等大家先體驗。我哋兒童中醫健康館呢樣冇人做過,如果做得好,仲可能發揚中國中醫文化。

陸︰未來你哋喺中國策略係點樣呢?

彭︰我哋將總部設咗喺南京,我哋第一間中醫健康中心,暫定就喺南京做,因為同南京中醫大學有合作,可以喺嗰度搵教授、專家來,提升品牌知名度。我哋o依家主力做近視,因為有百分之五十六的五歲以上小朋友有近視,初期近視其實有得醫,用中醫按摩醫得到,最少都可以唔畀佢惡化。第二係小朋友推拿,成人推拿市場已經飽和,但小朋友市場係冇,過程上一定辛苦,管理層都覺得難做,但好好彩搵到豐盛,睇好呢個前景。

陸︰醫院未來會投資幾多?

彭︰我哋希望三年間會開六十八間中醫館同醫院,第一間至三間用租嘅形式做,之後就可能會同地方政府拎醫療用地,因為醫療用地地價平,有啲地方政府更鼓勵咁做。我哋中醫健康院用地唔大,大約五萬至十萬呎之間,投資成本唔太高。你入來,就無西藥,唔好病先來,冇病就好來保健同預防。

陸︰有冇做吓調查,你哋喺國內品牌排名係點呢?

彭︰其實由兒童中藥理念來講,我哋係全國唯一一間,做兒童中醫院更係中國首間,世界唯一,o依家就係想將呢兩樣嘢做好佢。我哋預計第一間店二○一七年三月可以落成,之後只要複製就得,所以第一間要好好雕琢吓,花咗好多時間。

陸︰除咗兒童中醫院,仲有冇其他想法?

彭︰兒童中醫中藥係我哋發展大方向,但都會保持產品代理嘅形象,不過之前係做個人護理產品,但市場轉變好快,消費者對國內品牌唔係太認同,所以我哋引進國外產品,例如日本、韓國、澳洲,搵不同產品。

陸︰今年係你哋二十周年,有咩體會可以畀到啲後生仔呢?

彭︰最好就係好似中國女排啦,理念要堅持,一步一腳印,唔好一步登天,有目標就要堅持,自己就要承受到壓力,唔好放棄。機會唔係成日有,開業難,守業更難,一定要堅持自己理念,不斷創新,不斷進步。