演藝圈人才輩出，要擴展知名度，多個「星二代」銜頭，無疑會快人一步打出名堂。

現年二十一歲的關禮傑女兒關楓馨（Fabienne ），夠晒卜卜脆，更擁有時下煞食「女神」外表，早前還有傳她有意參選港姐，不過她卻斬釘截鐵否認：「我無話過要選美，都唔知點解會有人話我去選，我完全無興趣！」

其實不用選美，半隻腳已踏入娛樂圈的她，中學時期已成為娛樂記者追訪的對象。面對傳媒，關楓馨不但不會避之則吉，日後更打算於娛樂圈大展拳腳。「其實已經慣慣哋（畀狗仔隊影）o架喇！因為由細到大，都習慣爹哋係公眾人物，細個知道自己上咗雜誌，都唔會特別排斥，我好proud of做爹哋個女，爹哋亦都好支持我喺演藝圈發展。」

挾「星二代」標籤，關楓馨已贏在起跑線，其星途會否順遂，還需拭目以待。

關楓馨特別喜愛戶外活動：「我好鍾意睇戲同做運動，一星期會做幾日gym，亦好鍾意行山同踩單車，所以我咁黑。」

毫不吝嗇於網上大騷三點式泳衣照的她，喜愛玩浮潛，一身火辣身材自然成為亮點。

工作假期

近年以「星二代」加入娛樂圈的新血比比皆是，這天在父親經理人陪同下前來受訪的關楓馨，單論外表已經星味十足，更不時露出甜美笑容，再加上鬼妹仔個性，說話仍帶有不少外國口音，就連中、英文名都特別繞口過人。「Fabienne係媽媽改嘅，係法文嚟，喺香港好少見，但喺法國其實好普遍；細妹個英文名仲特別，係德文嚟，叫Franziska，中文名就係爸爸搵人改嘅。」可能骨子裏，父母都想她與眾不同。

早前關楓馨首次處女出騷，即被傳媒譽為「至索星二代千金」，想吸納「觀音兵」做擁躉，簡直易過借火，但想參見「娘娘」，看來還要等多兩年。

「我仲未諗到咁長遠，嚟緊我打算去澳洲working holiday一年，體驗生活，之後再去英國讀多個master（碩士學位），如果有適合嘅job都會接，咩類型都可以，出活動、拍戲、拍劇都想試，但唔會叫爹哋搭路，順其自然啦！」

今年於英國University of Southampton畢業的她，修讀教育系；亦曾於律師事務所當見習生，本想加入教師行列的她，卻臨時改變初衷。

「一開頭讀education（教育）係想教書，因為鍾意小朋友，但讀讀吓發覺，自己未必想喺呢方面發展，所以趁大學畢業，畀自己一個break（休息），九月中會去澳洲working holiday，其一係我好鍾意大自然同動物，其二係想睇多啲其他國家嘅生活文化，自己搵錢去support我嘅expenses（支出），周圍去搵part time做，由北面做到去南面，但就惟獨唔會去農場摘水果，因為我知一定會好刻薄，唔會畀得多錢，一年之後我會再返去英國讀master。雖然o依家乜嘢都係未知之數，但爹哋媽咪都想我喺出面體驗吓，自己照顧自己，當係磨練。」

去年聖誕節，一家四口到韓國首爾滑雪：「爹哋媽咪每年都一定會去滑雪，但我同妹妹就要等有假放先去得。」

身穿TopShop連身裙的她，早前與父親齊齊出席活動，擴展人脈。

她五歲時與家人到丹麥樂高樂園參觀小人國。

四歲時，關楓馨與母親特地到內地探父親班：「每年一到暑假，就好開心，可以去探爹哋，順便旅行。」