為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 09 月 16 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

彭少衍︰洗腦廣告打造衍生

提起開奶茶及七星茶,你會想起衍生(6893),創辦人彭少衍來自生意人輩出的潮州,當年隻身來港打拚,機緣巧合下被關員改了名字,由彭少延變成彭少衍,由打工至走水貨,歷經多年拼搏,最後成功衍生出今天的衍生集團。今期陸叔與認識多年的彭少衍一起暢談當年創業路之點滴。

彭少衍曾經多次創業,更試過走水貨,在創立衍生之前曾經是成功的代理商,高峰期代理過二十八個品牌。

 

陸︰彭兄,你落嚟香港嗰時,聽講你個名好似有個故事?

彭︰陸叔,喺一九八五年嚟香港嗰陣,我本來叫彭少延,過關嗰陣啲關員問我叫咩名,我唔識講國語淨係識講潮州話,關員又唔識聽,最後就變身做咗彭少衍。最初諗住過咗關先算,之後去改返咪得囉,點知拖吓拖吓仲未改。o依家諗番轉頭,我都好想多謝當日嗰個關員,如果唔係佢搞錯咗個名,就唔會衍生咗今日嘅衍生集團。

陸︰你當年隻身落嚟香港做過啲咩呢?

彭︰我初嚟埗到人生路不熟,又唔識廣東話,最後搵咗間做藥物批發嘅公司度做。我做嘢唔鍾意斤斤計較,雖然入職做倉務,有時見到廁所污糟,我都會主動幫手洗。做咗兩年幾開始識啲半鹹淡嘅廣東話,咁啱嗰陣有個銷售員走咗,我就有機會升職做銷售,後來老闆見我做到嘢,就畀機會我去做埋採購,同和記、大昌洋行、利豐接觸,唔經唔覺就一做六年,由倉務升到去做營業經理。

陸︰咁你係幾時先第一次創業嘅呢?

彭︰喺機緣巧合下我識到南北行嘅人,佢哋當時同緊白蘭氏打官司,又要兼顧做自己雙燕牌嘅冰糖燕窩,咁啱嗰陣我都好想創業,又有個朋友嘅爸爸有錢,佢可以出資一百八十萬,我哋就出資二十萬,一齊開咗間公司,就喺一九九○年,接咗雙燕牌嚟做,生意都做得唔錯。第一年我哋已經有百幾萬盈利,當年樽裝冰糖燕窩市場競爭少,除咗白蘭氏就係雙燕牌,白蘭氏賣得貴,我哋就平啲,好多人鍾意過年同聖誕都買嚟送禮,所以一年做兩次促銷,已經可以做到全年嘅業績。

陸:第一次創業就已經賺到過百萬應該好開心吖,咁點解後嚟會同拍檔拆夥呢?

彭:陸叔,我覺得無嘢係永久嘅,當時諗代理權得三年,如果中間發生咩嘅問題,又或者三年後人哋唔續約就麻煩,所以我提議搵多啲代理或者貿易做,但我個拍檔唔贊成,大家意見開始有分歧,最終我將啲股份轉返晒畀佢,自己出去再打工。

陸︰我同意分散風險係一個好嘅投資策略,咁你拆夥之後又做咩呢?

彭︰分散風險係應該要做,太太嗰陣喺青山道前京華戲劇嗰頭,喺一間商場入面開過零食舖,做咗兩三年都做得比較辛苦同吃力。

陸︰所以就係咁又諗住再出嚟創業呢?

彭︰哈哈,當年嚟香港都識咗啲做水貨嘅朋友,我睇佢哋走下水貨都幾好賺,咁我手頭上客多又得到朋友支持,好似要送十箱奶粉咁,叫部VAN仔一日走兩轉,都有五百幾蚊賺,一個月就有成萬幾蚊,感覺幾好又可以識到各方面嘅人,咪就係咁衍生咗衍生行。

陸︰衍生行初時係點攞啲牌子返嚟做嘅呢?

彭︰我哋嗰陣做到全港奶粉嘅九成半市場,直到喺一九九九年,匯率波動好大,我哋主要貨源又喺泰國、馬來西亞、新加坡同台灣,做水貨毛利原先已經好少,匯率波動隨時再賺少幾啲、更加有可能蝕錢,於是諗不如做返代理好過。咁啱「花世界」個代理商做得唔係幾好,我哋就去傾咗返嚟做,由奶粉轉行改賣沐浴露,之後就再傾埋做其他牌子好似澳雪等等。

陸:你既然做代理做得咁好,又點解要創立自家品牌?

彭:去到二○○四年,花王嗰陣喺香港有兩個代理商,佢哋只想留低一個,呢個情況又令我反思,萬一我哋被人停咗個代理權,我啲同事咪一下子失業,我又開始有危機感,決定做返自家品牌就一定穩陣,於是開始孕育咗衍生呢個自家品牌。

陸︰我記得你哋當年喺香港做推廣用咗好多電視廣告,係咪用呢個市場策略打開出衍生個名堂?

彭︰嗰陣香港環境唔好,電視台廣告價錢有得傾,加上亞視喺大陸收視幾好吖,所以我哋落咗好多廣告時段喺亞視,仲決定用亞視比較多人識嘅陳煒做廣告。不過落電視廣告就好似燒炮仗咁,幾秒燒完錢亦燒咗唔少,我哋於是將十五秒廣告拆開三段,由朝到晚係咁播,你開得電視就一定睇到澳雪、衍生嘅洗腦式廣告係咁播。

陸︰你哋呢個不斷重複又重複嘅廣告策略都令我印象深刻。咁你哋喺最高峰時一共代理過幾多個品牌呢?

彭︰最高峰時期代理過二十八個品牌,全部都係個人護理、護膚品,喺二○○四年我哋開始做自家品牌,就開始生產藥品,開發咗兒童藥品呢條路。(待續)