中秋佳節將至，除咗要人月兩團圓，同至親欣賞好戲，亦不失為過節好節目。今次「Paco巨星飯堂」，我就邀請到即將喺中秋黃金檔期上映嘅電影《S風暴》導演林德祿，聯同演技已獲得肯定嘅陳靜（DaDa），去到位於中環嘅「Bao Bei」，品嘗特別嘅fusion菜式，細說呢部關於反貪嘅寫實電影，背後嘅點點滴滴。

我帶林德祿導演同DaDa去到位於中環嘅「Bao Bei」，品嘗特別嘅fusion菜式，暢談佢哋喺中秋黃金檔期上映嘅電影《S風暴》。

飾演殺手嘅仔仔，喺戲中同DaDa相戀。

另類延續

因為一四年電影《Z風暴》嘅成功，造就林導打造仍然以反貪為題材嘅《S風暴》。新片沿用古天樂同DaDa，睇班底以為係續集，其實內裏故事截然不同，卡士上仲加入張智霖同周渝民等，星光同實力兼備。

曾獲金像女配角獎嘅DaDa就表示，今次首次喺戲中有親情線，原來佢情感豐富，話喊就喊，連導演都大讚佢收放自如。DaDa話：「戲中我嘅身世坎坷，原本生於小康之家，好仰慕品學兼優嘅哥哥（張智霖飾）。但係佢當差之後就變得好爛賭，仲搞到家破人亡，所以我對佢恨之入骨，跟住十五歲就輟學，仲做埋啤酒妹。之後在酒吧同佢重遇，心情好複雜，嗰場戲對我嚟講，真係幾難忘。」

拿捏好與Chilam嘅兄妹情仇，DaDa仲要同仔仔周渝民談情，亦因為Chilam嘅關係，令佢進退兩難。導演就進行適量劇透：「仔仔喺戲入面飾演戰地孤兒，細細個就被訓練成為獨行殺手，造型好Cool，全靠眼神交戲。佢同DaDa似無還有嘅愛情，係部戲嘅另一個枝節。」

棒棒雞（$98），外脆內juicy，配合微辣醬汁，一流！

三文魚他他配油炸鬼（$118），糅合東西方嘅精髓，質感特別。

蝦子雪茄（$138）係包裝成雪茄嘅春卷，色香味俱全。

導演盛讚DaDa喺戲中嘅表現外，亦大讚男主角之一古仔嘅專業。

實力認證

講到大綱取材，林導就表示眼見早年世界盃嘅外圍波風氣，荼毒香港太深，一年金額涉及百幾億，非常驚人，所以電影就以賭波為題材。佢話：「故事由一宗命案開始，從而貫穿三條主線，古仔（古天樂）繼續飾演ICAC首席調查員，調查一宗千億貪污案，加咗Chilam同仔仔，配搭上好有新鮮感。」

兩度與古仔合作，林導對佢讚不絕口：「古仔拍戲一向主導性強，佢好有心機，會主動提出意見。對上一次（《Z風暴》）佢嗰啲建議，我同監製未必認同。

「但係事隔兩年，古仔完全變成兩個人，他對戲劇嘅掌握、角色嘅揣摩功力，都有好大進步。今次佢嘅提議，有超過百分之九十都係好好，代表佢對電影好有熱誠，係一個好認真嘅演員。」

古仔（右二）喺戲中嘅角色係廉署首席調查主任，同電影上一集《Z風暴》屬同一角色；戲中仲有唔少演技派參與演出，包括蔡少芬、張松枝、石修同曾國祥（右至左）。

Chilam喺戲中同DaDa分飾兄妹，而且首演嗜賭警員，屬演技一大挑戰。

林保怡（前）係另一位有份參演嘅實力派，劇情安排佢被仔仔（後）所殺。

男神列陣

林導讚完古仔，亦不忘大讚身邊嘅DaDa演域夠廣。「DaDa拍被挾持嘅場口嗰陣，真係表現到嗰種歇斯底里同恐懼，演得好逼真。」

DaDa就笑住感激導演帶挈，令佢有機會同三大男神鬥戲。「佢哋各有魅力，都帶到我入戲。好似仔仔咁，有場戲我坐佢嘅電單車尾，我第一次坐o架咋，當時佢怕我會驚，就會提我攬緊佢，真係好識得照顧對手。

「而且我冇演過呢類型嘅角色，今次係一個好大嘅挑戰，又可以同三大男神都有對手戲，真係好開心！」

哈哈哈！咁我就預祝電影票房大收！乾！

包點拼盤（$188），包括牛肉漢堡包、豬腩肉割包同黃金魚三文治，西方嘅饀料配上東方的包，味道出奇地令人難忘。

麻婆豆腐炸薯條（$88）嘅外觀似足Cheese Fries，但係一入口就有濃烈嘅麻辣味，極具特色。

星洲炒扁意粉（$128），將一向夾開「星洲」嘅米粉換成扁意粉，效果相當理想。

煲仔滷肉飯（$128）混合台式同廣東嘅飯食特色，不可不試。

綠茶流心紅豆蛋糕配自家製維他奶雪糕（$88），兩者味道上相當配合。

Bao Bei

地址：中環雲咸街77號嘉兆商業大廈地庫1號舖

電話：28017779