為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2016 年 09 月 11 日

戲夢半醒 吳岱融

對於演戲,五十七歲的吳岱融以一個「迷」字來形容自己。

「只要我一入咗個角色,我就會好專注,任何人喺呢個時候騷擾我,將我喺個角色度扯出嚟,我都會好憎!」

是真的,例如他演《巨輪II》的「高天鷲」,劇已是一年前拍的了,但訪問時談到這個令他過足戲癮的角色,他仍然表現肉緊,完全入晒戲。「我只係個好聰明、智商好高,有錢又有權嘅變態佬咋嘛,我唔會覺得自己衰o架,我只係想喺我嘅霸權位置企得穩啫,有乜問題呀?好似尋晚嗰集咁,雖然劇情冇交代,但係好明顯我一早就用錢收埋咗人心,人哋先會落假口供囉!之後我仲會繼續搞倀雞英佢哋,因為我會……(內容有劇透,下刪五百字)」

為免這訪問最終變成了「高天鷲」專訪,我惟有把他「扯出嚟」,說回現實中他這個「吳岱融」角色,畢竟他自九三年離開無綫後,拍過三級片、轉攻到內地,又跟鍾淑慧結婚組織了家庭,經歷良多。

「人生如戲,戲如人生。我只係喺現實生活中演緊另一個角色,最重要係睇我用乜嘢心態去演啫。」

遊走於戲裏戲外,我想,他大概很享受這種「半醒」狀態吧——要不然,他應該早就發咗我忟憎。:p

伯樂

生於九十後的,應該不會知道在《巨輪II》中飾演「高天鷲」的吳岱融,在八十年代尾曾是無綫的當家靚仔小生。

他本是新加坡人,在當地出世,父親為商人,對下還有兩個妹妹。「我一出世就嚟咗香港,喺呢度長大,到廿一歲先返去新加坡服兵役。服完兵役,我喺lounge做業餘歌手,有次當年嘅亞視高層梁立仁嚟聽歌,問我有冇興趣做戲,就係咁,我就入咗新加坡電視台藝訓班。」

憑着其俊秀面孔,他在新加坡電視台甫出道便已孭重飛爆紅,拍了好幾齣劇集後,卻因一次腳傷被迫停工。「我爹哋媽咪嗰陣已經喺香港,我就過咗嚟,梁立仁就引薦我入TVB拍劇。」

八八年,他跟梁朝偉合演《絕代雙驕》,一個「花無缺」角色,馬上令他成為了許多少女的偶像,「你話梁立仁呢個人,對我嚟講有幾重要!我真係好感激佢o架!」

八十年代在無綫當小生的他,一臉青澀,樣子十分秀氣。

吳岱融在《巨輪II》中的「高天鷲」,成了整齣劇的關鍵人物。「好多謝王心慰搵我做呢個角色!之前宣傳出街時,我屋企人已經話呢個角色好搶!」

與梁朝偉和黎美嫻合演《絕代雙驕》,其「花無缺」一角色,俘虜了萬千少女心,成為了經典。

瀨嘢

在無綫當小生那幾年,吳岱融一直劇接劇拍個不停,愈拍愈沉迷演戲,卒之在九○年拍《天若有情》時抽離不到角色。

「呢齣劇有(黃)秋生同(鄭)伊健,我做個卧底,但阿爸臨死前,我都趕唔切話佢知真相;劉美娟做我女朋友,我親眼睇住佢畀伊健推落樓跌死;呂有慧係我親生阿媽,我七歲嗰陣佢走咗佬,跟住我有戀母狂,見番佢,都唔知佢係我阿媽,差啲同佢上咗牀;跟住呢,我仲要畀伊健雞姦咗……結果,我就瀨咗嘢!」鍾意咗伊健?「哈哈哈!唔係,我暫時仲未變,只係啲情緒好唔得,呢個角色人都癲,拍完之後,我自己都成日同人嘈交,個人火爆咗好多。」

例如之後拍的古裝劇《邊城浪子》。「我接咗呢個劇之後,我就買咗古龍原著嚟睇,好快就入咗『傅紅雪』呢個角色。點知有次拍嘅時候,導演同武指要我拔刀出嚟擋招,我就同佢哋拗咗好耐!因為原著唔係咁寫,『傅紅雪』就算係擋招,最多都只會用刀柄,要我拔刀嚟擋,我根本接受唔到!」

劇集《天若有情》的失敗卧底「華港生」,令吳岱融拍到人都癲。「比起『高天鷲』,呢個角色仲要沉重十倍!」圖左為當時只有廿三歲的鄭伊健。