為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人專訪 2016 年 09 月 09 日

蕾霆出擊 陳蕾安

父母總望子女成龍成鳳,最好日後可繼承衣缽,現年二十六歲的陳蕾安(Tiffany)亦不負眾望,早已踏足時裝領域,準備做接班人。

父母是「時裝王國」Moiselle國際集團創辦人陳欽杰和徐巧嬌,大哥是世界級賽車手陳思俊,二哥則是Ball場常客陳柏熹,現時擔任Moiselle商業發展部的細女陳蕾安,卻少有公開露面,她直言,不想模糊焦點。

「我比較低調,但我好努力做嘢,我想人哋acknowledge(承認)我,唔係因為我屋企嘅關係,所以以前我唔想去function(活動),唔想啲人將我冠名做『Moiselle太子女』、 『Harris(陳柏熹)個細妹』,我鍾意出去周圍闖,所以之前去咗上海同台灣生活,啲人未必知我係邊個,但就學到好多嘢返嚟,同我喺香港見到嘅嘢好唔一樣!」

放眼四方過後,陳蕾安已準備就緒,為自己的人生,全力出擊。

坦言喜愛中性打扮的她,對短髮情有獨鍾:「以前我都試過長頭髮,但我鍾意乾淨嘅感覺,而且我一有壓力就要剪頭髮,感覺成個人會輕晒!」

 

千奇百趣

一頭清爽短髮,身穿黑色西裝,戴着黑超到場的陳蕾安,單論造型已個性十足。「我鍾意中性打扮,細個已經係咁,鍾意着褲爬嚟爬去,反而着裙會令我覺得好唔自在。我唔覺得女仔一定要着低胸短裙先叫girly,裙同褲都係衫啫,人嘅性格,重要過用一件衫去取決你做人嘅態度。」

十四歲已到英國伯明翰讀寄宿學校的她,與二哥陳柏熹一樣,於London College of Fashion修讀Fashion Marketing, 一心跟隨父母步伐,走上時裝之路。一二年畢業後,即到上海恒隆廣場任職Hermès售貨員當見習生,誰知是惡夢開始。

「真係好大鑊!嗰時我啱啱喺外國返嚟,無人工,又無員工編號,每日着住高跟鞋企成十個鐘,而且又有好多文化差異,佢哋買嘢嘅方式同我嘅認知好唔同,每一日都有客人買成幾百萬嘢,一入嚟就話要最貴嗰樣,個個都話要Birkin同Kelly,但佢哋連個brand喺邊度嚟、個款係點都唔知。」

見習三個月,她笑言已見盡千奇百趣。

「啲客人好搞笑,佢哋想買Hermès個皮扣,以為個『H』字係個『工』字,一入嚟就話要買個『工字扣』;又話要買個老虎皮嘅Birkin,得閒無事就會攞啲袋入嚟問係真定假。最搞笑試過我哋入咗啲新款皮帶,佢哋凌晨四點就嚟排隊,排到我哋差唔多開舖,就係咁撞我哋對門。嗰日就好似Apple開賣iPhone咁墟冚,搞到要報公安,仲要閂舖!啲客人仲唔心熄,話我哋睇小佢,特登唔賣畀佢,話要跟埋我入倉攞貨 ;最騎呢又試過有客人畀錢時,攝咗張卡片畀我,叫我打畀佢,同佢一齊食個飯,真係好好笑!」

陳蕾安一二年於London College of Fashion畢業,獲父母到賀:「我同Harris都係讀同一間大學,佢讀Fashion management,而我就讀Fashion Marketing。」

從小與二哥穿兄妹裝的她笑言:「阿哥唔鍾意同我着一樣嘅衫,大個咗之後就開始嫌我煩,哈哈。」

熱愛時裝的陳蕾安,今年四月與二哥陳柏熹(左)及顧紀筠繼子陳浚霆(右)出席Dior Homme冬季男裝騷。

忍氣受辱

文化出現衝突,大多可以適應,但面對無理對待,卻只能默默忍受。

「我去上海嗰時,咁啱香港發生D&G(Dolce & Gabbana 禁止港人攝影風波)事件,好多客人入嚟,聽到我嘅口音係香港人,就即時鬧我話你哋啲香港人唔係覺得自己好叻o架咩?你嚟呢度做咩呀?你都係做saleso架咋⋯⋯覺得我一定無讀過大學,無乜學歷,講咗好多侮辱性嘅說話,幾乎日日都畀人鬧,好唔開心!」

每日要應付客人的言語洗禮已相當吃力,怎料連店長都玩針對。「當初我係因為有個uncle係Hermès嘅GM for Asia(亞洲總經理),所以先入去做,啲同事都估到吓(我嘅背景),因為唔係個個都入到去做intern,所以個法國店長好唔鍾意我,覺得我係拉關係先入到嚟,成日人身攻擊我:『你做乜企到咁唔開心啫?唔想做嘅咪唔好做囉!』有好多呢啲說話聽,對我嚟講係好大衝擊,我乜都無做過,但就係咁畀上司同客人鬧,以前都無畀人鬧過,我有反省係咪因為我平時個樣唔笑,所以啲人對我有錯覺?」

一向於溫室長大的她,結果受不住侮辱,情緒失控。

「我做到第三日,就打電話畀媽咪,係咁大嗌大喊話:『你畀咁多錢我去讀書,係咪諗住我企舖企一世?我唔做嘞!你成日都逼我出去(做嘢), 又唔見你逼阿哥?點解我要企喺舖頭度,日日畀人鬧?我已經學晒全部產品知識,知道每一條絲巾嘅背後古仔,但根本無人想知呢啲古仔,咁我咁畀心機去學嚟做乜?』係咁喊,好徬徨!」

一三年母親徐巧嬌生日,一家人特地為她慶祝牛一,「我哋o依家每個星期五晚都會一齊去教會。」

陳蕾安表示其中文名有意思:「爸爸媽媽想我好似花蕾咁,喺一個好安全嘅環境下,健康成長。」