為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2016 年 09 月 10 日

港姐是非精逐隻捉

《2016香港小姐競選》最後十強佳麗,在周日(十一日)正式進行決賽,爭奪后冠殊榮。跟歷屆港姐選美一樣,女仔多自然是非多,而今屆亦不例外!

本刊獲得絕密爆料,有知情人士踢爆今屆「是非精港姐」,專門擦鞋、埋堆、搞小圈子,又有「認叻港姐」疑似篤數、博like為自己造勢,就連入圍名單都涉嫌早已內定。選美背後,佳麗們勾心鬥角,內幕絕對比台上更精采!

港姐十強誕生,周日(十一日)正式進行決賽,有指一眾佳麗除了鬥靚鬥身材之外,另有明爭暗鬥,多女仔難免多是非。

 

搞小圈子

《2016香港小姐競選》破天荒玩大堆頭,最初階段入圍佳麗足足有三十位;不過,經過兩輪淘汰,現時只剩下十位進入最後階段的決賽。一眾佳麗除了鬥靚鬥身材之外,私底下明爭暗鬥也是常識吧!本刊得到知情人士爆料,知道不少港姐選美內幕。

據知情人士透露,矛頭直指10號單文柔是今屆港姐的「是非精」。有指外表似鄰家女孩親切可人的她,性格完全是表裏不一,知情者說:「佢最愛搞小圈子,成日『馬』住啲海外佳麗,埋堆贏面較高嗰幾個海外佳麗博friend,猛讚人哋靚;而對住本地佳麗,特別佢認為陪跑嗰啲,就完全唔同面口,見人哋擺亂少少嘢、做錯乜就即刻啄住人,仲鍾意篤人背脊!」據指,單文柔「蝦」陪跑份子「蝦」到出面,而奉承保母及幕後工作人員則「落足鞋油」,知情者續說:「佢整晒蛋糕凈係請海外佳麗同保母嗰啲食,又見到佢賣晒口乖,話多謝人哋照顧喎,好識做人!」

知情人士爆料指,今屆港姐10號單文柔乃「港姐是非精」,玩擦鞋、玩埋堆,但就「明恰」陪跑份子,她回應時否認,又表示不同時間愛黐不同佳麗玩。

 

懷疑造票

據悉,今屆十位決賽港姐當中,4號的代蓮曦丹美也被指是「麻煩友」,與其他佳麗關係都好麻麻。自參選以來,她經常標榜自己有蒙古貴族血統,她姓氏「塔塔爾」的祖先,曾嫁成吉思汗做第四位夫人,於是她便經常以「郡主」自居,知情者稱:「聽到話啲佳麗唔鍾意佢成日認屎認屁,仲話佢逼人叫佢做郡主喎!」除了自抬身價,代蓮曦丹美更被懷疑,在無綫和一些傳媒於社交網所搞的投選活動中「造票」。早前一個社交網投選,原本票數落後的她,一夜間離奇激增千多二千票,最後更殺上攞「第一」,知情者質疑:「明眼人都知咩事啦,雖然啲投選活動唔係正式成績,但佢都造起個勢先囉!」

有指4號代蓮曦丹美經常標榜自己有蒙古貴族血統,逼人叫她「郡主」自抬身價之外,又涉嫌在社交網投選活動中「造票」,她就表示自己是blogger有大量粉絲,所以拉票事半功倍。

 

否認指控

日前,本刊求證兩位當事人,10號單文柔否認搞小圈子:「都唔知點解會咁傳?之前可能同一兩個女仔比較friend,但其他女仔都好close,我都唔知邊啲佳麗叫有potential(潛質)定冇potential?通常只係因為冧把接近而比較傾多啲偈,而且唔同時間都有唔同,想傾吓偈玩嗰陣,可能會覺得我同Tiffany(2號劉穎鏇)、Andrea(5號蘇韻姿)friend啲,因為佢哋係比較搞笑嘅女仔嚟。有時我攰,又會一個人發吓呆,所以完全冇話埋邊個堆,就算入唔到圍嘅女仔,我都仲有聯絡,所以絕對唔係事實。」

至於,代蓮曦丹美也呼冤:「之前佢哋叫我郡主或者郡主BB都係講笑咁。我第一次聽都反應唔到過嚟,所以冇可能逼人咁叫我,我都係個普通女仔,讀緊書,所以大家叫我Daisy得喇!」她又解釋,早前社交網投選活動,一夜激增千計票數,應該是因為她在instagram、facebook大力拉票的成果,之前做fashion blogger儲落一大班粉絲,當有投選活動時,便轉貼連結叫人投自己一票,但強調自己絕對沒有造票或者買like。

此外,又盛傳無綫高層事前向三名海外佳麗暗示,回港參選必定入圍十強,最後來自洛杉磯的2號劉穎鏇,以及多倫多的5號蘇韻姿,都順利進入決賽,唯獨來自溫哥華的謝泳思於二十強止步。知情人士指,謝泳思被淘汰後向身邊人大吐苦水,揚言大失所望,未有想過自己這麼早便被淘汰,但無可奈何,惟有靜候其他入行機會!

單文柔外表似鄰家女孩,但有指她表裏不一,為人勢利,專跟贏面高佳麗埋堆。

單文柔(左)與被傳勝算較高的海外佳麗蘇韻姿(中)和劉穎鏇(右),特別friend,被指刻意搞小圈子。

代蓮曦丹美就讀港大教育系碩士,但未畢業便已先創業,開公司搞網上時裝平台,並由自己出任時尚總監。

代蓮曦丹美與其他佳麗站在一起,但完全冇偈傾顯得格格不入,似乎跟其他佳麗關係好麻麻。